ВепКар :: Тексты

Тексты

Вернуться к просмотру | Вернуться к списку

”Oma Muale” – 30 vot!

История изменений

02 июля 2020 в 11:07 Нина Шибанова

  • создал(а) текст
  • создал(а) текст: 30 vot tagaze 8. kezakud läksi eloho ezmäine lehtesen nomer karjalan kelel. Se oli ühten aigan Karjalaižiden suimanke, mitte mäni Olonec-lidnas. ”Oma Mua” om üksjäine mirus lugendlehtez karjalan kelel. ”Oma Muan” toimišt radab ”Periodika” -paindištos, kut i toižed lehtesed Karjalan rahvahaližil kelil. Ezmäine “Oma Mua”-lehtesen nomer oli vaiše nel’l’lehtpoline. Nügüd’ lugendlehteses om eskai 12 lehtpol’t da se lähteb kerdan nedališ kaikuččen koumanz’päivän. Ezmäižen lehtesen pätoimitajan oli Viktor Makarov. 30 vodes lugendlehteses oli äi vajehtesid. Vajehtihe pätoimitajad, toimitajad. Vajehtamata jäi vaiše lehtesen pätegend – kehitoitta, kaita da toda rahvahale čomad karjalan kel’t. Oli aig, konz ”Oma Mua”-lehteses kirjutadihe livvin paginal, a pohjoižkarjalan paginal kirjutadihe toižel ”Vienan Karjala”-lehteses. Äjak-se vot tagaze nene lehtesed ühtenzoittihe da nügüd’ ”Oma Mua”-lehteses voib löuta kirjutesid kut livvin paginal, muga pohjoižkarjalan paginal. Lugendlehteses voib lugeda Karjalan kul’turižes, politižes elos, opendamižes da äjiš toižiš tärktoiš karjalaižile azjoiš. Voib löuta paginad melentartuižidenke ristituidenke: tedomehidenke, opendajidenke, openikoidenke, politikmehidenke, aktivistoidenke da m.e. Nügüd’ “Oma Mua”-lehtesen toimištos radab 12 lahjakast da nor’t toimitajad, kudambad navediba ičeze radod. Niiden keskes oma Ol’ga Smotrova, kudamb radab pätoimitajan, Marij a Spicina, Jelena Ruppij eva, Uljana Tikkanen, Elina Potapova, Margarita Kemppainen, Irina Zaiceva. Ližamäraližiden radnikoiden keskes oma Natalja Antonova, Alevtina Lesonen, Ol’ga Ogneva, Aleksandra Lesonen da Valentina Mironova. Kaik lehtesen toimitajad oma ei vaiše lahjakahad toimitajad, no mugažo aktivistad, tedomehed da karjalan rahvast da kel’t navedij ad ristitud. Hö tegeba ičeze radod armastusel südäimes. ”Oma Mua”-lugendlehtez lugedas Karjalas da toižiš Venäman regionoiš, Suomen susedmas. Nügüd’aigaližed tehnologij ad andaba ”Oma Muale” voimusen jagadas ičeze päkirjutesil da toimišton uzištoil VKontakte-lehtpolenki abul. Lehtesen jubilejaks oli paindud praznikaline nomer, mitte oli 16-lehtpoline. Neciš nomeras voib löuta tedoid lehtesen istorij as, radnikoiš da pätoimitajiš. Ičeze lugij oiden täht toimitajad tegiba muga sanutud prazniknedalin. Nece nedal’ oli tehtud Karjalan joukvestišton da socialižiden verkoiden abul. Ozutesikš, 3. kezakud zavodihe “Onnittele “Oma Mua” merkkipäivällä”- flešmob. Joga tahtnik voi ozatelda lehtest da sen radnikoid praznikanke videon abul da kirjutaden VK: verkos. 6. kezakud mänetadihe “Oma Muan” istorii-test venän kelel. 7. kezakud oli Online-“Oma Muan” avaitud uksiden päiv. 8. kezakud mäni Valentina Mironovan lekcii fol’kloras da pauklahjoičend. Kaik nene azjtegod oliba VK:verkos, lehtesen gruppas. Pidab sanuda, miše sen gruppan nimi om “Oma Mua – paras lehti”. Mö küzuim lehtesen toimitajil, mikš “Oma Mua” om parahim lugendlehtez heiden täht. Elina Potapova: ”Oma Mua” om parahim lugendlehtez, sikš miše se om üksjäine da unikaline lehtez karjalan kelel. Lugendlehteses oma melentartuižed eritematižed kirjutesed erazvuiččen magun mödhe: kul’turas, kundas, etnografi jas, istorij as, oma literatur-da lapsiden lehtpoled. Kaik lehtesen toimitajad oma ristitud, kudambad südäimel armastaba maman kel’t, kehitoitaba sidä da kaičeba, levenzoitaba karjalan kel’t da kul’turad”. Ol’ga Smotrova: ”Oma Mua” om parahim lehtez karjalaižiden täht. Se om lehtez karjalan rahvahas, tradicij oiš, küliden elos, toponimoiš da äjiš toižiš azjoiš. Meiden lehtez ühtenzoitab Karjalan, Tverin da Suomen karjalaižid”. Uljana Tikkanen: ”Nece om kuti veresen il’man hengahtuz – lugeda maman kelel veresid uzištoid, melentartuižid starinoid ristituiden elo-ozas. Voib olda, erasile ristituile ei ole kenenke pagišta karjalaks, a lehtesen abul lugii voib kosketadas kirjutesiden avtoroidenke da hengidenke. Ken-se lujas tahtoib opeta karjalan kel’t da lehtesen abul kehitoitab lugemižen da kändmižen mahtoid. Paiči necidä, toimitajad mänetaba azjtegoid karjalaižiden täht, tegeba lugij oiden suimid, kus voib tundištadas uziden ristituidenke da löuta uzid sebranikoid. Völ, lugendlehteses om äi sädandradod, kus zavodij ad toimitajad da kirjutajad voiba probuida ičtaze. Sädandradole “Oma Mua”-lehteses kaiken löudub sija. “Kodima”-lehtesen redakcii tahtoib ozatelda meiden sebranikoid da kollegoid surenke jubilejanke da toivotada hengen libutandad, uzid idejoid da niiden eloho lähtendad.