VepKar :: Texts

Texts

Return to list | edit | delete | Create a new | history | Statistics | ? Help

Taroi Babukoine. Uništused eläba meiden hengiš!

Taroi Babukoine

Uništused eläba meiden hengiš!

Veps
New written Veps
Uništused...ned kehitoitaba meiden mel’kuvitelust. Kut voib eläda uništusita!?

Ken ei uništand šapkas, miččes niken sindai ei näge!? Siš voib kacta parahimiden openikoiden lehtikoihe! A ken ei tahtoind noidasišt pühkint, mitte andaiži sinei mittušt taht magedust!? A kut-žo oliži čomin kävelta manzikaižes vihmas! Vai kazvatada padas ičeze pu, miččen oksil lehtesiden sijas oliži kanfetoid! Nügembad tahtoiba sada lahjaks noidasižen kaluižen, miše kaik heiden uništused tuližiba eloho! Iče minä uništin ištimes, mitte voiži leta. Školas lopihe urokad, minä ištumoi ištimele i lendan kodihe!

Nece om muga melentartuštuništada! Kaikuččel ristutul om ičeze tahtoid. Minä küzuin ičemoi sebranikoil, miččid tahtoid oli heil, miš uništiba laps’aigan. Nügüd’ sebranikad oma kazvanuded. Erasil heišpäi om jo ičeze lapsid. No surel tahtol johtutiba ičeze uništusid da starinoičiba minei. Erased heišpäi jagasoiš niil teidenke!

Tahtoin opetas otmaha kerdale lahjoid unespäi. Magadan minä čomin, unes nägen sidä, miš uništan. A sid’ el’gendan, miše nece om uni, pigai minä heraštun. Siloi kingitan sadud lahjoid kädehe, miše ei jätta niid unehe.

Minai oli mugoine uništuz: tahtoin tehta laut da ehtatadas sil sebranikoidenke päliči järves.

Minä tahtoin, miše oliži mugoine mašin, mitte voiži sirtta mindai kuna taht.

Uništin tehtas supergerojaks, miše abutada meiden man jaugmäčvändon joukule vägestada mirun čempionatal. Tezin eskai, mitte sädo tariž panda päle supergerojile.

Minä uskoin, miše ristutud, ku lujas napridas, voiba kävuda läbi seiniš, oigeta melid toižile, leta...Openzimoi tehmaha hot’ midä-ni sišpäi. Vellenke ladim oigeta melid toine toižele, naprim kävuda läbi seinäs. Ed usko, äjak kuhmuid libui meiden ocile!

Uništin kengiš, miččed oliba EllilIzumrudižen lidnan noid–kirjaspäi. A völ tahtoin tehtas pičuižeks, miše leta bumaglendimel. Ku sanuda tot, tähä aighasai tahtoin putta sarnaližehe maha!

A minä uništin vastata mecas todesižen el’fan vihandad kengäižed jaugas. Mikš-se minä meletin, miše suugad, miččid vezikorendod jätaba rogoihe, oma el’foiden suugaižed. Konz olin kezapertiš, peitimoi puiden da penzhiden taga, miše nägištada todesižid el’foid.

Minä en navedind väta tätüižihe. Uništin obezjanas! Tahtoin, miše se eläiži minunke. ühtes käveližim külädme. Tal’vel minä sobitaižin sidä, panižin pövun sen päle. Konz minä pakičin mamal obezjanad, hän sanui minei: ”Kazvad, iče ičeleiž ostad!”

Kaiken tahtoin, miše minun vanhembad heitäižiba kaik tarbhatomid kaluid gardalejalpäi, i minä voižin tehta ičelein pertižen sigä. Uništin, kut veižin sinna bobaižid da armhid kirjoid.

Sebranikanke susedpertišpäi navedim pagišta telefonal. uništim, miše meil oliži völ ekran, miččel voižim nähta toine tošt. Žal’ om, miše siloi ei olend Skype –programmad.

Tahtoin kaita neičukašt požaraspäi, vai keda-ni, ken habi ei uptand.

A minai oli mugoine uništuz. Konz en voind uinota öl, kuvetelin, kut ikun avaidase, i minä lendan ičemoi magaduzsijal irdale.

Laps’aigal minai oli sebranik. Kerdan minä küzuin hänel: ”Ku sinai oliži koume tahtod, midä sinä tahtoižid?”. Han andoi mugoižen vastusen: ”Ezmäine taht, miše ristutud nikonz ei läžuižigoi. Toinemiše ristutud eläižiba igän. Koumanz’miše ei oliži voinad mal”. Siš aigaspäi mäni jo 30 vot. Äjan om vajehtanus. Ei vajetanus vaiše nene koume tahtod.

A miš uništad sinä? Kirjuta da oigenda meile! Sinun uništuses tedištaba kaik Kipinän lugijad!