VepKar :: Texts

Texts

Return to list | edit | delete | Create a new | history | Statistics | ? Help

Larisa Smolina. Elodme astub pajonke

Larisa Smolina

Elodme astub pajonke

Veps
New written Veps
Jubilei: Männuden voden lopus tal’vkun 30. päiväl täudui 75 vot vepslaižele aktivistale Jevgenii Markovale.
Necil päiväl sanumaha lämid da huvid vaihid, toivoid, tehmaha lahjoid Jevgenii Grigorjevičale tuliba hänen heimolaižed, sebranikad, Vepsän kul’tursebran ühtnikad.
Vepsän kul’tursebran varapämez’ Svetlana Pl’uhina andoi Jevgenii Markovale kitändkirjaižen, kudamban oigenzi Pohjoižen, Sibirin da Edahaižen päivnouzman igähižiden rahvahiden associacii.
Jevgenii Markov om sündunu Änižröunan agjaha, Šokš-posadaha vodel 1938. Hän openzihe šokšulaižes školas, lopi sen da putui opendamhas Petroskoin tehnikumha mecan radnikaks. Jäl’ghe armijad Jevgenii Grigorjevič radoi Onežskii-
traktorzavodal da möst openzihe.
Konz hänele täudui 23 vot, hän tundištoitihe ičeze Nadežda-akanke. Svadib tehtihe Pudožan agjas, Porštas, kus eli akan pereh i sil aigal radoi iče Nadežda Petrovna.
Konz ak lopi opendusen da radon Porštas, hän tuli elämaha mužikannoks lidnaha. Markovoil sündui kaks’ last: prihaine da neičukaine. Nadežda Petrovna da Jevgenii Grigorjevič radoiba T’ažbummašzavodal, oliba tehnologad, a ehtkoižil openzihe völ. 34 vot Jevgenii Markov radoi necil zavodal. Sigäpäi läksi pensijale.
Ühtes akanke läksiba elämaha kodiküläha Šokšhu. Tegiba sigä Keradam i kaičem-pajosebran, kirjutiba iče pajoid vepsän i venän kelel, kirjutiba muzikad, ajeliba koncertoidenke susedkülihe da agjoihe. Lapsiden da heiden vanhembiden täht šokšulaižes školas Jevgenii da Nadežda Markovad tegiba Ilokazansambl’an. openziba lapsid ičeze kelehe, ozutiba lapsidenke sarnoid, tegiba teatraližid ozutelusid, pajatiba da kargaižiba. tegiba eskai Šokšun školas penen vepsläižen muzejan. Konz Jevgenii da Nadežda Markovad pörzihe elämaha lidnaha, tuliba pajatamha vepsläižehe Randainepajogruppaha. Heil oli tozi muzikaline pereh. Jevgenii Grigorjevič völ službal armijas, a sid’ zavodal-ki vändi orkestras, a hänen ak lopi Pedučiliščan.
Oli Jevgenii da Nadežda Markovoil tehtud čoma duet, konz kahten pajatiba da vändiba erazvuiččil muzikaližil soitimil: mandalinal, gitaril, garmonil, balalaikal. Ak iče kirjuti muzikad, runoid venän kelel, a Jevgenii Grigorjevič kändi niid ičeze kelehe. Üks’ mugoižiš pajoišpai om Pensionerad-pajo.
Vodel 2012 Jevgenii da Nadežda Markovad tegiba Vepsän man mujud-kirjan vepsän kelel, mitte sai elon Rahvahaližen politikan komitetan raha-abunke. Neche kirjaha keraziba Šokš-külan eläjiden ilosižid starinoid vepslaižiden elon polhe. Heiden kirj tegihe melentartuižeks kaikile, ked tedaba da opendaba vepsän kel’t, tedištaba vepsän rahvahan endišt elod.
Om lujas žal’, no muloi Markovoiden kanzaha tuli sur’ gor’a. Läksi elospäi Jevgenii Grigorjevičan ak. Nece gor’a tuli kaikuččehe kanzaha, kus tetihe Nadežda Petrovnad. muštam händast igän. Jügedemb kaiked om nügüd’ Jevgenii Grigorjevičale, ved’ eliba akanke enamba 50 vot ühtes, kaiken aigan oliba toine toženke rindal. kaik toivotam, miše Jevgenii Grigorjevičan sur’ kanz abutab hänele palahtelda necidä surt gor’ad, miše vunukad, lapsed, sebranikad linneba hänenke kaiken rindal. Olgha Jumal andab teile väged, vahvad tervhut, kaičeb kaiken teid!