VepKar :: Texts

Texts

Return to list | edit | delete | Create a new | history | Statistics | ? Help

Marina Ginijatullina. Lapsed ozutiba ičeze vepsän kelen mahtoid

Marina Ginijatullina

Lapsed ozutiba ičeze vepsän kelen mahtoid

Veps
New written Veps
Vastused: Kanman Ut vot, tal’vkun 25. päiväl, konz praznuitas Raštvoid, suomalaižugrilaižes školas oli Valdkundaline Raštvoiden konkurs.
Täl vodel se mäni jo kaks’toštkümnenden kerdan. Konkursaha ühtniba lapsed, kudambad opendasoiš 4.-5. da 6.-7. klassoiš.
Ezmäižil vozil necehe konkursaha ühtniba lapsed, kudambad openziba vaiše suomen kel’t. Nügüd’ kaikutte tahtnik voib ozutada ičeze tedoid ei vaiše suomen, no mugažo vepsän da karjalanki kelil.
Lapsed, opendajad da vanhembad kerazihe školan surehe zalaha konkursan avaidusele. Ol’ga Hramcova, openduzradnikoiden radmahtoiden täudenzoituzinstitutan metodist tervehtoiti kaikid lämil sanoil. Seičemenden klassan openikad pajatiba čoman pajon. Sid’ konkursan vedäi sanui, ken radaškandeb žuriš, i lapsed läksiba radhonusihe, miše pagišta Uden voden da Raštvoiden polhe.
Vepsläižehe honusehe kerazihe seičeme ühtnikad: Nadežda Demina, Daniil Lonin, Anita Sebina, Polina Kononova, Jana Naumova, Aleksandr Lonin da Seimur Mustafajev. Kaik nene lapsed paiči Jana Naumovad oma suomalaiž-ugrilaižen školan openikad. Jana om Šoutjärvespäi.
Kaikuččele lapsele tarbiž oli antta vastusid küzundoihe Uden voden da Raštvoiden polhe, tehta tegoid sanoidenke da test tedomašinal.
Neniden tegoiden ližaks kaikutte ühtnik ozuti koditegendoid. Muga Nadežda Demina pajati pajon penen kuzen polhe vepsän kelel, Polina Kononova toi tehtud sebras kruževsidondan tehmusen, Aleksandr Loningnomoiden pertižen, Anita Sebina vaumiči kuzen, Jana Naumova tegi kodiš čoman raštvoiden änikpal’mikon, Daniil Lonin pirdi tal’vmecan kuvan.
Lapsed vaumičihe hüvin, i žurile oli jüged valita parahimid. Kaikutte ühtnik sai diploman da lahjan. Mugomad ilokahad da lämäd Raštvoiden vastused lämbitaba südäimid. Nadeimoi, miše ningomad konkursad linneba edemba-ki.