VepKar :: Texts

Texts

Return to list | edit | delete | Create a new | history | Statistics | ? Help

Galina Baburova. Sel’ktas-ik vedes kalatam?

Galina Baburova

Sel’ktas-ik vedes kalatam?

Veps
New written Veps
Larisa Smolina da Vladimir Slavov tegiba uden fil’man vepsläižiden tradicionaližes salištandaskalatuses. Neciš fil’mas oli letud lujas tarbhaine päivänteraline küzundkalan sal’hen vähenduz.
Fil’man prezentacii mäni Rahvahaližiden kul’turiden keskuses. Sihe kerazihe äi rahvast. I nece ei muite, ristitud amu jo teziba fil’man tegemižes da surel tahtol varastiba sidä. Sel’ktas vedes kala kokib-fil’m om Larisan da Vladimiran jo koumanz’ projekt.
Vepsläižiš starinoičiba heiden edeližed-ki fil’mad – ”Živatad vepsläižiden elos”, ”Vepsläižen kodin südäin”. Ezmäine fil’m täl vodel sai Gran-pripaukan suomalaiž-ugrilaižiden fil’moiden festivalil Estinmal.
Uden fil’man sjomkad mäniba KarjalasPetrosjoiš, Šokšus, Šoutjärves, Kaleiges, Toižeges, Kaskezas, Kvarcitnijas, da Piterin agjasLadvas, Kurbas, Nemžas. Materialan keradamižele mäni kuz’ kud. Küliden da lidnan eläjad jagoihe fil’man tegijoidenke melentartuižil azjoil. starinoičiba siš, miččid kalatesen mahtoid om, miččid kalatesehe sidotud veroid om. Mugažo fil’mas om ozutadud kalakurnikan da lemen vaumičend.
Udes fil’mas om letud päivänteraline-ki küzund. Küliden eläjad holduba, miše kivitegeližuz’ vepsläižiden eländtahoil tegeb pahut londusele, päazjanveziümbrištole, Änižele. Pagištas, miše vezi Änižes om vauged, kuti maid reduspäi, paksus voib nägištada vedes mazutad. Jäl’gmäižiš voziš kalan saliž väheni. Fil’man tegijad vastsihe Karjalan Tedokeskusen Pohjoižen Institutan da Petroskoin universitetan Tedo-oppindinstitutan radnikoidenke. Tedomehed tegiba erazvuiččid veden tarkištelendoid. Sid’ andoiba ičeze arvod veden ladule. Tedomehed tegiba mugoižen ühthevedon: vezi Änižes om normas. No ei katelgoi, miše veden ozutajad pigai voiba völ vajehtadas.
Se znamoičeb, miše küliden eläjad holduba ei uhtei. Londuz redustadas. Nece azj völ voib tehtas problemaks. Miše pätta problemoid, pidab niiš pagišta! Mugoižed fil’mad voiba tehta rehkaidust probleman pätandan pol’he. Fil’moid vepsläižiš ei ole äi. A mugoižid, miččiš starinoitas vepsläižiden problemoiš da holiš, om völ vähemb. Siš om uden fil’man päarv.
Sel’ktas vedes kala kokib-fil’m oli tehtud Karjalan rahvahaližen politikan da uskondsebroiden ministerstvan regionaližen programman raha-abul.