Texts
Return to list | edit | delete | Create a new | history | Statistics | ? Help
Maria Filatova. Lapsed ozutiba ičeze mahtoid vepsläižes pajos da kargus
Maria Filatova
Lapsed ozutiba ičeze mahtoid vepsläižes pajos da kargus
Veps
New written Veps
Uhokun
22.päiväl Šoutjärv-posadan augotižškolan pertiš oli Vepsän pajokera-muzikaline festival’ .Sihe ühtniba lapsed Änižröunan erazvuiččiš külišpäi : Šoutjärvespäi , Kalagespäi da Šokšuspäi .Školiden openikad da pičuižed lapsed ozutiba ičeze mahtoid vepsläižes pajos da kargus .
Vepsän pajokera-festival’ mäni ezmäižen kerdan .No idei tehta sen , sündui jo amu .Šoutjärves jo enamb nel’l’t vot ei olnu lapsiden horad .Sil oli pit’k elote – horale oli 25 vot .Nece oli lujas sur’ i hüvä azj .Ved’ pajatades vepsän rahvahan pajoid , lapsed otiba eloho ezitatoiden kul’turad , tradicijoid , mugažo openzihe pagižmaha vepsän kelel .Muga pol’vespäi pol’vehe anttas rahvahan veroid .Šoutjärv-školan opendajil sündui mel’ – tehta festivalin , miččehe voižiba ühtneda lapsed .Opendajad ühtes openikoidenke suren melenke tartuiba radho .
Šoutjärven školan pämez’ Natalia Bikova starinoičeb : ”Lapsed tahtoiba kävutada vepsän kel’t elos-ki , ei vaiše školan urokoil .Ende , konz oli lapsiden hor , lapsed voinuižiba tehta sen .Nügüd’ horad ei ole .Školan urokoiden ližaks , ičeze joudajal aigal lapsed keradaba fol’klormaterialoid : sarnoid , ozoitesid , častuškoid .Mö tahtoim kerata fol’klormaterialoid ühtehe i ozutada rahvahale .Kaik školan radnikad surenke melenke zavodiba radon .Festivalin täht om ombeltud äi uzid kost’umoid .Kazvatajad oma tonuded lujas suren abun : hö iče poimiba sädoid , abutiba čomitada zalan .Voib sanuda , miše radho tartui kaik škol – kut pened lapsed , muga vanhembad-ki ”.
Kaikile tetab Šoutjärven hor avaiži festivalin čomal pajol .Jäl’ges eziniba pičuižed lapsed , miččed käveleba lapsiden päivkodihe .Niiden keskes oli Kalagen päivkodin lapsid .Neciš päivkodiš vepsän kelen opendamine zavodihe necen openduzvoden augotišes .Nügüd’ lapsed melenke ozutaba ičeze tedoid da mahtoid .Urokoid lapsile andab školan opendai Julia Aprodu .Kalagen školaspäi festivalile mugažo tuliba nel’l’änden klassan openikad .Hö vaumičiba Rusked bolaine - da Pened kalanikad-pajod .
Svetlana Gotič , Kalagen školan pämez’ , sanub festivalin polhe : ”Minä tahtoin , miše mö voižim ozutada lapsile , kus mö voim pagišta vepsän kelel .Tahtoin , miše lapsed voižiba vastatas toine toiženke .Nece om lujas čoma azj .Ku lapsed el’gendaba , miše vepsän kel’ om čoma , miše se om maman kel’ , siloi školas-ki hö zavodiba opeta vepsän kel’t melenke , zavodiba navet’t’a sidä ”.
Festivalin adivoile oli ezitadud lujas melentartuine čoma programm .Scenal kargaitihe , vedätihe horovodoid , pajatadihe pajoid , častuškoid , ozutadihe vändoid da veroid .Šokšun muzikaližen školan Hobedad jäntked-ansambl’ vändi stribunikoil .Šoutjärven školan nel’l’änden klassan openikad ozutiba Stroicanpäjan veron : neiččed čomitiba koivun da pajatiba pajoid .Videnden klassan openikad ozutiba vepsläižen besedan .
Šokšuspäi tulnuded koumanden klassan openikad pajatiba pajon kürziden polhe .Lapsed zavodiba opeta vepsän kel’t vaiše pol’ vot tagaze .Anastasija Konošenko , vepsän kelen opendai , tahtoib , miše lapsed oližiba aktivižed i enamba pagižižiba vepsän kelel .
Laudkundad arvosteli muzikaližid mahtoid , mugažo kelen tedoid .Niken ei jänd homaičuseta .Kaikutte grupp sai kitändkirjeižen .Korktemb arvznam oli anttud Šoutjärven školan toižen klassan openikoile .Lahjaks lapsed saiba kucundan ekskursijale Karjalan rahvahaližehe muzejaha .
Vepsän pajokera-festival’ toi kaikile adivoile äi uzid , hüvid melid .Lapsil om melentartuz’ baboiden da dedoiden kul’turaha , kel’he .Se andab toivon , miše meiden kelel om tuleb aig .Olgha Vepsän pajokera-festival’ eläb äi vozid i tuleb hüväks tradicijaks vepsän mal .
Lapsed ozutiba ičeze mahtoid vepsläižes pajos da kargus
Veps
New written Veps