VepKar :: Texts

Texts

Return to list | edit | delete | Create a new | history | Statistics | ? Help

Galina Baburova. Pajokeraine-muzikfestival’ toi ihastust kaikile

Galina Baburova

Pajokeraine-muzikfestival’ toi ihastust kaikile

Veps
New written Veps
Festival’: Lapsed ozutiba ičeze mahtoid vepsläižes pajos da kargus.
Jo toižen kerdan Šoutjärves mäni muzikfestival’Pajokeraine”. Se kerazi lapsid Kalagen, Šokšun, Šoutjärven školišpäi da lapsiden päivkodišpäi. Meletadihe tehta se Rahvazkeskeižel kodikelen päiväl. Necil vodel erasiden jügedusiden taguiči festival’ tariž oli sirtta. Laske vähäižen möhemba, no kaik-sePajokerainepidätihe.
Täl kerdal lapsed paniba völ enamba vägid festivalin vaumičendaha. Ved’ kaikuččen voden saskeleba uzid tedoid da mahtoid, sikš kazvab-ki taht ozutada ičeze satusid toine toižele. Om melentartušt ozutada midä-se ut, miše ei tošttas.
Šokšun školas vepsän kelen opendamine zavodihe muloi, a lapsiden päivkodiš vaiše necen voden augotišespäi. No lapsed surel tahtol opendaškandeba vepsän kel’t. I om sel’ged, miše heile mugažo tuli taht ozutada adivoile, mihe openzihe neciš aigas. Pidab sanuda, miše Šokšun školan lapsed ezitiba ičtaze lujas korktas.
Ei hubemba eziniba toižed-ki lapsed. Täl vodel pajo- da kargezitusiden täht oli valitud mecan tem. Lapsed pajatiba londuses, mecživatoiš. ozutiba londusen änid, kargaižiba kuti ojaižed da mecaneläjad. Festivalin tegijad pätiba, miše necil vodel festival’ pidab omištada 110-vodele Vasilii Kononovan sündundaspäi. Lapsile pidab teta da muštta mugošt tetabad horeografad, kudamb ülenzoiti vepsän rahvast. Festivalin augotišes kaikile oli ozutadud tetab vepsläinekarg luzikoidenke”, miččen hän tegi Kanteleansambl’an kargnikoidenke.
Paiči lapsid päivkodišpäiPajokeraižeheühtniba openikad koumandespäi seičemendehesai klassahasai. Pälahjan žurijouk andoi Kalagen školan Ilokahad lapsedkollektivale (ohjandajad: Ol’ga Mironova da Tatjana Mehannikova). Lapsed ozutiba, kut ende neiččed da prihad kävuiba besedoile. ozutiba ei vaiše hüvid kelen tedoid, no artistan mahtoidki. Kacujad-žo nimitiba parahimaks Šoutjärven lapsiden päivkodin kollektivanMarjaine” (ohjandajad: Ol’ga Kokorina, Ales’a Anušenkova, L’ubov’ Kiprijanova).