VepKar :: Texts

Texts

Return to list | edit | delete | Create a new | history | Statistics | ? Help

Kipinä-kulugendlehtez sai korktan pauklahjan

Kipinä-kulugendlehtez sai korktan pauklahjan

Veps
New written Veps
Arvlahj: Karjalan valdkundan päivän pauklahjoitihe Sampo-premijan laureatoid.
Karjalan pämehen Sampo-premii pauklahjoitas taidehen da literaturan mehile suriš satusiš rados. Se anttas kerdan kahtes vodes znamasižes panendas literaturaha, teatraližehe da muzikaližehe taideheze. Tobjimalaz necen korktan premijan pauklahjoičendan täht valitas viž laureatad.
Ezmäižen kerdan, nece oli vodel 1999, pauklahjan saiba Armas Mišin da Eino Kiuru Kalevala-eposan udes kändmižes, Viola Mal’mi Karjalan rahvahiden fol’klortradicijoiden kaičendas, kompozitor Aleksandr Beloborodov Heng da londuz-oratorijan tegemižes, Aleksandr Trifanov Londusen mir-taidehtöiš da Karjalan rahvahaližen teatran akt’oroiden jouk Sügüz’ da tal’vspektakl’as. Kahesastoštkümnes vodes oli pauklahjoitud enamb mi pol’sadad mest. Vodel 2013 premijan sai vepsän rahvahan mam, meiden kalliž Nina Zaiceva, sures panendas vepsän kelen udessündutandaha da kaičendaha, unikaližiden literaturižiden töiden tegemižes.
Necil vodel Sampo-premijan laureatoiden keskhe putui Kipinäkulugendlehtesen toimitajiden kollektiv sures panendas Karjalan rahvahaližen kul’turan kaičendaha da kehitoitandaha.
Meiden toimištole oli lujas mel’he sada mugoižen korktan pauklahjan Karjalan valdkundan pämehelpäi. Toivotam edembaki rata napernas, miše sabustada toižid-ki surid satusid. Kitäm meiden radnikad, taidehpirdajad Margarita Jufad. Hänen kuviden taguiči meiden kulugendlehtez om tetab ei vaiše Karjalas, no kogonaižel Venämal da eskai verhiš maiš, – sanuib Kipinä-kulugendlehtesen pätoimitai Oksana Čurigina.
Paiči Kipinäd pauklahjan saiba kirjutai da runoilii Jurii Linnik Stefanos-kirjas, taidehpirdai Lev Burin, Kelen, literaturan da istorijan institutan arheologijan sektoran pämez’ Svetlana Kočkurkina da Karjalan draman teatran sädaijouk Minun maman da minun polhe-spektakl’as.
Pauklahjoičend mäni surel scenal Karjalan valdkundan päivän praznuičendan aigan Sortavala-lidnas.
Ozatelem meiden kollegoid, Kipinä-kulugendlehtesen toimitajid, Sampo-premijan samiženke i toivotam heile ozad da uzid sädaisatusid rados!