VepKar :: Texts

Texts

Return to list | edit | delete | Create a new | history | Statistics | ? Help

Irina Sotnikova. Opeta kodikel't lapsiden päivkodišpäi

Irina Sotnikova

Opeta kodikel't lapsiden päivkodišpäi

Veps
New written Veps
Petroskoiš sulakun 1.-28. päivil mäni valdkundaline Kazvatai2015-konkursan etap. Necil vodel ezmäižen kerdan oli tehtud nominaciiKazvatai, kudambal om oiktuz’ opeta kodikel’t lapsiden päivkodiš”. Konkursaha ühtni viž kazvatajad, kudambad opendaba lapsid karjalan da vepsän kelihe. oliba Petroskoišpäi, Oloncaspäi, Šoutjärvespäi. Kaik konkursan azjtegod mäniba Lumikello-lapsiden päivkodiš Petroskoiš.
Konkursas oli koume etapad. Ezmäižes etapas konkursan ühtnikoile pidi ezitada žürijoukule ičeze lapsiden päivkodiden internet-saitoid. Toižes etapas kazvatajad starinoičiba ičeze polhe da ičeze radon polhe. Jäl’gmäižehe etapaha mülüiba urok lapsidenke da mastar’-klass aigvoččiden täht. Neciš etapas konkursan ühtnikad ozutiba ičeze opendaimahtišton, kut voiba löuta kosketusid lapsidenke, miččid uzid tehnologijoid da openduzmahtoid kävutaba rados.
Konkursan vägestajaks tuli Mirja Hotejeva, Lumikello 20-päivkodin kazvatai Petroskoišpäi. Hän opendab lapsid karjalan kel’he. Mugažo oli nimitadud kaks’ laureatadAles’a Anušenkova Šoutjärvespäi i Natalia Romanova Oloncaspäi.
Ales’a Anušenkova radab Šoutjärven lapsiden päivkodiš jo nel’l’ vot. Lapsiden päivkodihe kävub läz 40 last. Sigä lapsed opendaba vepsän kel’t koumes vodespäi. Ühtes ičeze kazvatajanke pajataba vepsläižid pajoid, kargaidaba, ozutaba sarnoid, tundištasoiš vepsän rahvahan tradicijoidenke. Vändformas Ales’a opendab lapsid navedimha kodikel’t, ičeze rahvhan kul’turad da tradicijoid. Nece rad om Ales’ale mel’he. Hän lujas navedib lapsid, el’gendab heid. A lapsed hüviš meliš käveleba päivkodihe, rižaba necidä armastust, i tedaba, miše Ales’a Nikolajevna kaiken tugedab heid.
Ales’a Anušenkova ühtni Voden kazvatai-konkursaha aigemba-ki. Siloi hän mugažo tuli laureataks. Konkursan ühtnendas da ičeze tundmusiš hän sanub muga:
Necil konkursal minä tedištin äi ut.
Nägištin, kut radaba toižed lapsiden kazvatajad, kut opendaba ičeze kodikel’t lapsile. Konkursas oli koume etapad. starinoičim ičemoi rados, tegim mastar’-klassoid. Kaikid jügedamb minun täht oli urok lapsidenke, sikš ku niid sinä näged ezmäižen kerdan. Pidi kut-se mel’dütoitta lapsid, tundištadas heidenke, a kaikehe oli anttud 20 minutad. Olen mel’he, miše ühtnin konkursaha. Ved’ nece om hüvä voimuz vajehtadas radmahtištol ičeze ühtradnikoidenke, sada uzid tedoid i otta niid ičeze radoho.
Lapsiden kazvatajan elorad om lujas jüged i sil-žo aigal tärged i arvokaz. kazvataba meiden lapsid, paneba heihe hüvüt, armastust, niišpäi ripub, miččen ristitun kazvaškandeb laps’. A lapsed oma meiden tulii aig.
Ozatelem Ales’a Anušenkovad i toivotam hänele tervhut, ozad, väged da uzid satusid rados!