VepKar :: Texts

Texts

Return to list | edit | delete | Create a new | history | Statistics | ? Help

Maria Košeleva. Praznik korktoiden kuziden da pedajiden al

Maria Košeleva

Praznik korktoiden kuziden da pedajiden al

Veps
New written Veps
Kul’tur: Kezakun 11. päiväl vanhas Šoutjärv’-küläs mäni jogavozne vepsän Elonpu-praznik.
Kut männuzil-ki vozil se oli čomal Änižjärven randal. Praznikale kerazihe külänikad da adivod Petroskoišpäi, Piterišpäi da Suomespäi. Korktoiden kuziden da pedajiden al levedal pallištol seižui scen, kus oli azotadud čoma da sur’ praznikan znam.
Praznikan augotišes scenale tuli kaks’ neičukašt-vedäjäd čomiš vepsläižiš sädoiš. avaižiba praznikan. Sid’ ičeze tervhensanoidenke eziniba Karjalan kul’turan ministr Jelena Bogdanova, Rahvahaližen politikan varapämez’ Jelizaveta Haritonova da Šoutjärven elotahon administracijan pämez’ Irina Safonova. Kaik virkiba hüvid da lämid sanoid, kitiba kaikid adivoid tulendas, andoiba lahjoid praznikan tegijoile. Suomespäi tuliba Liperisebran ezitajad pämehenke Jorma Pitkäiženke. Hän-ki sanui äi lämid sanoid praznikan tegijoile. Jorma lujas toivob, miše kosketused suomalaižiden da vepsläižiden keskes kehitoitaižihe edemba-ki.
Oficialižen palan jäl’ghe oli sädaikollektivoiden ezitusid. Praznikale tuliba fol’klor-etnografine Karjala-sebr, Karjalan rahvahan Oma pajo-hor, Venäman pajon Pitarici-hor da eskai germanian kargun Folklorevagen-sebr. No mitte-žo vepsläine praznik linneb Šoutjärven vepsän rahvahan horata. Nece kollektiv kut i tobjimalaz čudutoiti da ihastoiti kaikid adivoid ičeze melentartuižil pajoil da karguil.
Azjtegon lopus oli tehtud aukcion, miččel ristitud voiba ostta ičeleze miččen-se hüvän da tarbhaižen azjan.
Praznikan aigan pallištol radoiba möndrivid. Ristitud voiba ostta sigä erazvuiččid čomid muštlahjoid, vepsläižid paštatesid. Völ voiba ambuskelta tiras, voibišteldas ken edemba tacib mäčud, vedäda kanatad da äi tošt. Lapsed ühtniba melentartuižihe mastar’-klassoihe. Rahvahaližen muzejan radnik Anna Anhimova openzi heid paštmaha vävun pirgoid. Kaik lapsed oliba hüviš meliš, sikš ku iče tegiba magedusid da adivoičetiba niil vanhembid.
Necil vodel Karjalas ei paksus ihastoitab rahvast. Naku sil-ki kerdal ristituid varastiba vihmasišt da vilud säd. No praznikan augotišes päiväine läksi pil’viden tagapäi da ihastoiti kaikid.
Kacmata säha praznikale tuli äi ristituid. Sigä oli kut penid lapsid, muga vanhoid-ki ristituid. Oli lujas hüvä, miše praznikale tuli äi norištod-ki, da heile oli lujas melentartušt olda necil azjtegoil. Nece praznik ühtenzoiti kaikid ristituid, külänikoid da lidnan eläjid. Se om lujas tarbhaine azjkerata ristituid ühthe. Ristituile pidab enamba lebaita londusel, vastatas tutabidenke ristituidenke da mänetada aigad ičeze armhidenke. Kaikuččen voden Elonpu-praznik andab rahvahale necen voimusen! toivom, miše tulijal-ki vodel se möst keradab äi rahvast da lahjoičeb kaikile hüväd mel’t!