Texts
Return to list | edit | delete | Create a new | history | Statistics | ? Help
Maria Košeleva. Läm’ vastuz vilul mal
Maria Košeleva
Läm’ vastuz vilul mal
Veps
New written Veps
Kül’mkun
4.-8.päivil Suomen pohjoižes , penel Inari-tahoižel mäni jogavozne norišton forum ”Barents Roots ”.Vepsäks se kätas kut ”Barencan jured ”.Necidä forumad tegeb Barencan regionan norišton nevondišt jogahižen voden .Tariž sanuda , miše Barencan regionaha mülüb nel’l’ mad – Venäma , Suomi , Ročinma da Norvegii .Forumaha tuliba kaikiden neniden maiden ezitajad .Foruman pätegendan om ühtenzoitta norištod , mitte mülüb Barencan regionaha , tehta muga , miše jogahižen man ezitajad tundištaižihe toižiden rahvahiden kul’turanke da veroidenke , vajehtaižihe mahtištol da löudaižiba sebranikoid toižiš maišpäi .Neciš vodes forum oli omištadud rahvahiden veroile , kelen da kul’turan jurile .Neche azjtegoho kaiken ühtneb aktivine norišt , mitte tahtoib sauda sildoid maiden da niiden kul’turiden keskes , levenzoitta ičeze sebranikoiden ümbrištod da ühtenzoitta rahvahiden veroid nügüdläižiden azjoidenke .
Ühtnikoiden täht oli tehtud lujas melentartuine programm .Kaik oli tehtud muga , miše nikelle ei olnuiži tuskikast , no muga-ki , miše olnuiži joudai aig uziden tundištoitusiden tegemižele .Kaik koume päiväd nored ristitud ühtniba mastar’-klassoihe .Völ siloi , konz ühtnikad oigenziba pakičusid foruman tegijoile , hö ozutiba ičeze anketoiš , miččehe mastar’-klassaha hö tahtoiba ühtenzoitta .Foruman augotišeks kaik ned oli jo jagatud gruppoihe ičeze mastar’-klassoiden mödhe .Niid oli viž , jogahižen ühtnikan magun tahton mödhe : ”käzitöd ”, ”muzik ”, ”komedijan teatr ”, ”media ” da ”ičekehitoituz ”.
Ezmäižes ”käzitöd ”-mastar’-klassas opetihe tehmaha erazvuiččid azjoid villaspäi da nahkaspäi , ühtnikad tundištihe rahvahiden käzitöiden erigoičusidenke da tegiba ičeze sebranikoiden täht hüvid da čomid muštlahjoid .”Muzik ”-mastar’-klassas ühtnikad vändiba erazvuiččil vändimil da pajatiba .
Koumes päiväs hö meletiba kaks’ pajod , miččid ozutiba loppraznikal jäl’gmäižel päiväl .”Komedijan teatr ”- mastar’-klassas ühtnikoid opetihe vändmaha teatrlaval , heile ozutadihe erazvuiččid melentartuižid scenmahtoid .
”Media ”-ühtnikad oli jagatud kahthe gruppaha – video - da fototegijoikš .
Heile starinoitihe , kut om oikti tehta videod da fotokuvid , ozutadihe necen radon erigoičusid .Kogonaižen foruman aigan kaik necen mastar’-klassan ühtnikad tehliba fotokuvid da videod , kävuiba toižile mastar’-klassoihe da ajeliba čomid tahoidme .Praznikal oli ozutadud parahimad videod da fotod .Jäl’gmäižes , no ei znamoičendan mödhe , mastar’-klassas , miččen nimi oli ”ičekehitoituz ” ühtnikad vändiba rol’vändoihe da pagižiba nügüdläižen elon jügedusiš da azjois , ühtniba diskussijoihe da debatoihe .
Kaikid tärktemb om se , miše jogahižes mastar’-klassas norištod tundištoittihe jogahižen rahvahan kul’turanke .Azjtegon pätandan oli norišton tundištoituz Barenc-regionaha mülüjiden maiden kelenke , kul’turanke , juridenke da veroidenke .Nored ristitud saiba kul’turkeskeižiden kosketusiden mahtišton da saiba uzid kosketusid i tundištoitusid .
Lopus voib sanuda , miše mugoižed vastused oma lujas hüväd da tärktad .Iče ühtnikoiden sanoiden mödhe , mugoižiš azjtegoiš taguiči kosketused regionoiden keskes tegesoi völ vahvembaks , a se veb uziden projektoiden tegemižeks .Erased ühtnikad oliba sigä ezmäižen kerdan , toižed oma jo kaikenaigaižed adivod .No kacmata sihe kaik tegihe sebranikoikš jo ezmäižen päivän i lujas lämäs mänetiba aigad vilul , no čomal mal .
Läm’ vastuz vilul mal
Veps
New written Veps