VepKar :: Texts

Texts

Return to list | edit | delete | Create a new | history | Statistics | ? Help

Galina Baburova, Maria Filatova. Openikoiden satused – opendajiden arvtego

Galina Baburova, Maria Filatova

Openikoiden satused – opendajiden arvtego

Veps
New written Veps
Täl vodel Änižröunan školad praznuičiba sur’t jubilejad. Jubilejaks oli pidätud lujas äi erazvuiččid praznikaližid tegoid. Openikad da opendajad paniba äi vägid sen täht, miše jubilei läksi čomaks.
Suren azjtegon oli konferencii, mitte mäni kanman jubilejad Šoutjärven školas. Se pidätihe 10. kül’mkud Änižröunan školiden openikoiden täht. Edel konferencijad Šoutjärven vepsläižen etnografižen muzejan pämez’ Natalia Anhimova ozuti adivoile jubilejaks tehtud ozuteluz, mitte oli vedätud Kalagespäi, kus se mugažo oli pordon aigad. Ozutelusehe om keratud harvinaižed azjbumagad da fotod, miččed om ottud muzejan da Karjalan rahvahaližen arhivan fondoišpäi. Sil om školiden enččiden pertiden da opendajiden fotod, lehtikod arvsanoidenke, kartad, miččil om znamoitud, kus ende sijaidihe školad vepsläižiš küliš.
Konferencijale Šoutjärvehe tuliba openikad Kalagen, Šokšun, Suomalaiž-ugrilaižen, Šujan da Ladvan školišpäi. Nece om sel’ged, miše konferencijan päteman oli Änižröunan školad. Openikad starinoičiba neniden školiden männudes da nügüdläižes aigas. Pidab sanuda, miše openikad lujas hüvin vaumištihe konferencijaks: rohktas vediba paginoid, čomin ezitiba ičeze dokladoid. Eskai tehnižed vigad konferencijan augotišes ei telustanugoi penembile lapsile, koumanden klassan openikoile ezineda hüvin. Ližaks, iče dokladad oliba lujas melentartuižed. Openikad keraziba lujas harvinaižid da tarbhaižid tedoid, miččid ei kaikutte tedab.
Tarbiž znamoita, miše openikoiden prezentacijad-ki oli korktas arvostadud žürijoukul. Nägub, miše külähižiš školiš levedas kävutoittas nügüdläižid tehnologijoid. Pidab sanuda, miše openikoiden satused oma školiden opendajiden arvtego.
Arvostelemha openikoiden töid tuliba adivod Petroskoišpäi: Änižröunan Administracijan opendusen da socialižen kehitoitusen erišton pämez’ L’udmila Parhomuk, Karjalan Rahvahaližen politikan ministerstvan radnik Jevgenia Šustova, Opendusen kehitoitusen institutan metodist L’udmila Räppijeva da Vepsän kul’tursebran ühtnik Svetlana Pas’ukova. Nene organizacijad oliba konferencijan tegijoin-ki. Adivod lahjoičiba kaikile lapsile da opendajile, kudambad ühtniba konferencijaha, muštlahjoid da diplomid. Ladvan škol mugažo tegi lahjan vepsläižihe školihekuzid tulijoikš praznikoikš.
Lopihe jubilejan praznuičend vepsläižiš školiš. Adivoiden täht lapsed ühtes opendajidenke vaumičiba koncertad. Scenal pajatadihe, kargaitihe, lugiba runoid, ozutadihe sarnoid, mušteltihe školiden istorijad da starinoičiba školan nügüdläižes elos.
Praznikal johtutadihe enččid opendajid. Heiden keskes oma todeks lahjakahad ristitud, kudambad paniba äi vägid ičeze radho. Praznikehtal mušteltihe školiden pästnikoid. Enambišt sai hüvid professijoid da löuzi radon.
Jubilejan aigan oli sanutud äi lämid sanoid školiden polhe, sen opendajiš da openikoiš. Školile toivotadihe äi vägid, satusid rados da pit’käd igäd.