VepKar :: Texts

Texts

Return to list | edit | delete | Create a new | history | Statistics | ? Help

Anastasia Makarova. Meid ühtenzoitab üks’ tärged azj!

Anastasia Makarova

Meid ühtenzoitab üks’ tärged azj!

Veps
New written Veps
Necil vodel tal’vkun augotišes Moskvas da Moskvan agjas mäni ezmäine Pohjoižen, Sibirin da Edahaižen Päivnouzman igähižiden vähäluguižiden rahvahiden norišton forum. Se oli lujas tärged azjtego igähižiden rahvahiden norišton täht. Kaik norišt, mitte ezitab Venäman igähišt vähälugušt rahvast, voib necil azjtegol tundištadas toine toiženke, vajehtadas rahvahan kaičendan da kehitoitandan mahtištol da tedištada uzid melentartuižid da tarbhaižid azjoid siš.
Nügüd’ mail’mas kaik enamba pagištas ičeze rahvahas, ičeze sugus, keles da rahvahudes. Ristitud arvostaškandeba ičeze jurid völ lujemba da ladiba kehitoitta ičenašt kul’turad da kel’t, tahtoiba ozutada kaikile, miše oma toižed, ei kuti kaikutte ristit, miše oma üksjaižed. Sihe voib vaiše ihastuda. Ved’ kaik enamb rahvast meiden mal kadob, ristitud konz-se unohtiba ičeze juriš, da nügüdehesai äi rahvahid tegeškanzihe vähäluguižikš. Kaik tedaba, miše norišton käziš om kaik, i mugoižen aktivižen norišton täht oli tehtud nece forum!
Forum jatkui 5 päiväd, sen aigan ühtnikoile oli tehtud sur’ da melentartuine programm. Ei olend ni üht minutad, miše lebaitas, kaik openzihe da radoiba napernas. Jogahižen päivän ühtnikoile tuleskeliba erazvuiččed tetabad ristitud politikan da ekonomikan miruspäi, tedaba ičeze azjan lujas hüvin, sikš starinoičiba norištole kut tarbiž rata, midä pidab teta da tehta ičeze rahvahan kaičendan täht. Tuleskeliba tutabad sportmehed-ki da tv-vedäjäd, kudambad ičelaze ozutesel ozutiba, miše kaik om meiden, norišton käziš, miše tarbiž uskta ičeze radoho da vägihe. Mugažo joga päiväl oliba ištundad, miččil ühtnikad jagoihe ičeze mahtištol da diskutiruiba aktualižid küzundoid. Pidab sanuda, miše niken ei tahtoind eskai lebaitas, ved’ kaik openduz, kaik lekcijad da ištundad oliba mugoižed melentartuižed da tarbhaižed.
Forumaha kerazihe läz 40 erazvuittušt rahvast enamb ku 28 Venäman agjoišpäi. Nored ristitud löuziba uzid sebranikoid da ühthižradnikoid jogahižes Venäman agjaspäi, se om čudokast!
Mail’mas om erazvuiččid rahvahid erazvuiččiš man agjoiš. Ken-se heraštub homendesel, a ken-se necil aigal vaiše vereb magadamha, kaikuččel om ičeze irdnägo, mitte erineb toižišpäi, no kaiken-se meil om üks’ ühteitte azj, mitte ühtenzoitab meid. Se azj om mugoine tärged, miše om tundmuz, miše kaik olem ühten azjan paladkaik navedim ičeze rahvast, tahtoim kaita necidä da tegem kaiken sen täht!