VepKar :: Texts

Texts

Return to list | edit | delete | Create a new | history | Statistics | ? Help

Maria Košeleva. Ühtes radam ičemoi rahvahiden hüvüdeks

Maria Košeleva

Ühtes radam ičemoi rahvahiden hüvüdeks

Veps
New written Veps
22. – 27. uhokud Moskvalidnas mäni noriden ezinikoiden škol, miččen nimi oliTulijan aigan töpaja”. Se oli Pohjoižen, Sibirin da Edahaižen päivnouzman polen igähižiden vähäluguižiden rahvahiden ezinikoiden škol. Heiden keskes oli norid aktivistoid, kundaližid da politižid tegijoid, professionaližid opendajid da harjoitajid.
Tulijan aigan töpaja oli noriden aktivistoidenke radon jatkundan. Ezmäine etap oli völ proidnuden voden tal’vkus Venäman pohjoine-forumal. Täl kerdal školha ühtni 25 kaikid aktivižembad regionoiden ezitajad. Školan programm oli oigetud noriden organizacijoiden ezinikoiden kompetencijan da mahtišton täudenzoitusehe. Openduzprogrammaha mülüiba erazvuiččed lekcijad, seminarad, mastar’-klassad, harjoitused. Ühtnikad openzihe kut oikti tehta da kaita ičeze projektoid, kut čomin pagišta da ezineda kundliijoukun edes da äi tošt. Školan ühtnikad mugažo vastsihe tutabidenke politižiden da kundaližiden tegijoidenke, kudambad jagoihe mahtištol da starinoičiba igähižiden vähäluguižiden rahvahiden elos da olendas, neniden rahvahiden kehitoitandan da kaičendan mahtoiš.
Venäman kundaližes palatas mäniba erazvuiččed vastused, kus ühtnikad voiba diskutiruida päivänteraližid küzundoid. Nece programm oli lujas melentartuine da tarbhaine jogahižen ristitun täht, kudambal om hol’ ičeze rahvahan tulijas aigas.
Jäl’gmäižen päivän Rahvahiden pertiš mäni školan sauptamine. Ühtnikad ezitiba projektoid, miččid tegiba joukuiš školan aigan da saiba sertifikatoid. Pidab sanuda, miše se oli lujas hüvä da tarbhaine azjtego, mitte abuti kaikile ühtnikoile uskta sihe, miše meiden vähäluguižil rahvahil om lujas pitk’ elo, da, voib olda, tulijal aigal nene rahvahad ei olgoi vähäluguižin. Ved’ ei muite sen školan lozungaks tuliÜhtes tegem tulijad aigad”.