VepKar :: Texts

Texts

Return to list | edit | delete | Create a new | history | Statistics | ? Help

Anastasia Konošenko. Vänd heredoiden täht

Anastasia Konošenko

Vänd heredoiden täht

Veps
New written Veps
20. uhokud Šoutjärven školas jo seičemenden kerdan mäni voin-patriotine vändZarnica”. Kaikuččel vodel paiči vändod školas om konferencii. Täl kerdal konferencijan teman oliHul südäin”. Lapsed starinoičiba premijan polhe, miš da kenele se anttas.
Täl vodel vändho ühtni kuz’ joukud Šoutjärven školaspäi da üks’ jouk Kalagespäi. Openikad napernas vaumičihe sihe da äjan harjoitelihe. Joukuile pidi mända seičeme stancijad: matematikališt, istoriališt, časud-stancijad, ekskursijad Šoutjärvedme, kodirandan stancijad, mitte oli muzejas, požarstancijad da ozatomusiden situacijoiden stancijad, mitte mäni školan sportzalas.
Kaikuččel stancijal lapsiden täht oli vaumitud melentartuine tegend. Mugožo openikoile pidi joksta počtale da löuta sigä peitkal’huden.
Matematikaližel-stancijal tarbiž oli tehta lugutegoid, časud-stancijal pidi antta vastusid küzundoihe školan istorijan polhe, istorialižel stancijal tarbiž oli tehta tegendoid, miččed oli omištadud Suren voinan temale. Požarstancijal openikad paniba päle hengituzkaičimid, a školan sportzalas lapsed marširuiba da tehliba toine toižele sidegid. Muzejas pidi starinoita voinan aigan predmetan polhe da meiden külänikoiden urohontegon polhe.
Völ oli üks’ melentartuine tegend komandiroiden täht. Heile tarbiž oli kerata Kalašnikovan avtomatan. Kaik komandirad da joukud ozutiba hüvid satusid.
Ezmäižen sijan sai Šoutjärven školan jouk, miččen komandiran oli Naumova Jana, kahesanden klassan openik.