VepKar :: Texts

Texts

Return to list | edit | delete | Create a new | history | Statistics | ? Help

Adivod Petroskoišpäi vepsän man školiš

Adivod Petroskoišpäi vepsän man školiš

Veps
New written Veps
Tämbei Šoutjärven da Šoksun školad vastsiba adivoid Petroskoišpäi. Larisa Smolina da Ol’ga Sobolenko oliba sigä kahten: LarisaVepsän kul’tursebran da Karjalan radion polespäi, Ol’gaKarjalan rahvahaližen politikan ministerstvaspäi. vaumičiba lapsile čoman programman. Ezmäks tegiba mugoižen akcijanMidä minä tedan igähižiden rahvahiden polhe”. küzuiba, midä znamoičeb terminigähine rahvaz”, miččed igähižed rahvahad eläba Karjalas, miččehe kel’kanzaha mülüb vepsän kel’, miččed praznikad tehtas vepsläižiš küliš da m.e. Heile oli melentartušt mugažo kacta, kut lapsed hüvin tedaba da el’gendaba vepsän kel’t. Ozutesikš, kut voiba käta venän kel’he mugoižid vaihid, kutpagišta oc ocha”, ”jumalanlehmäine”, ”vauged unida toižid.
Sid’ ezitiba openikoile Pagiškam vepsäks!-video-urokad. Ned läksiba eloho muloi Vepsän kul’tursebran abul da Karjalan Rahvahaližen politikan ministerstvan rahatugel. Neciš projektas radoi lujas äi ristituid. Scenarijoid video-urokoile kirjutiba lehtmehed, tedomehed, opendajad da vepsläižed aktivistad. Sjomkoihe ühtniba vepsläižiden küliden eläjad, heiden lugus oliba openikad Kalagen da Šoutjärven školišpäi. Täl vodel planoiš om tehta völ viž liža-urokad, sjomkad linneba jo necil kezal. A jo sügüzel lapsed saba uzid diskoid videourokoidenke.
Vastusen lopus Larisa da Ol’ga ihastoitiba openikoid čomal fil’mal. Sen tegi kaks’ vot tagaze Moja planetatelekanal. Sjomkad fil’man täht mäniba Änižröunan vepsläižiš küliš. Fil’man nimi omVepsläižed, Kändmižen jügedused”. Fil’mas ozutadas vepsläižed külänikad, vepsän rahvahan uskondveroid, vanh Iona-Jašjärvelaine monastir’ da Uz’ Zavet-kirj. Vepsän kel’he sen kändi Nina Zaiceva. Fil’mas voib kacta, kut rahvaz el’gendab Jumalan tekstad ičemoi kelel.
Kaik lapsed oliba hüviš meliš. lujas tarkas kundliba kaiken, andoiba hüvid vastusid kaikihe küzundoihe i sanuiba, miše möst varastaba vepsläižid aktivistoid ičeze školihe.