VepKar :: Texts

Texts

Return to list | edit | delete | Create a new | history | Statistics | ? Help

Tulii aig rippub norištospäi

Tulii aig rippub norištospäi

Veps
New written Veps
10.-16. kezakud Venäman čomas Moskva-pälidnas mäni II rahvazkeskeine norišton rahvahan sädairadon da mul’timedian Nor’ Arktik-2017- festival’. Se oli festival’-konkurs, miččehe ühtnikad voiba oigeta ičeze radod -fil’mad. Kaik ühtnikad oma nored fil’mantegijad. Konkursan päteman oli pohjoine da pohjoižrahvahad.

Tarbiž sanuda, miše festivalin tegijan om Pohjoižen, Sibirin da Edahaižen Päivnouzman igähižiden vähäluguižiden rahvahiden associacii.
Festivalin avaidamine oli praznikaližel Venäman päiväl Lehtezmehen pertiš. Sigä mäni melentartuine koncert, miččel eziniba norišton da lapsiden sädaisebrad. Pajataden da kargaiten ozutiba ičeze kul’turad. Associacijan pämez’ Grigorii Ledkov ezini tervhensanoidenke da sanui, miše hänele om lujas mel’he nähta muga äi norištod zalas ühtnikoiden keskes. Kogonaz konkursaha ühtni 11 radod. Vägestajad saiba hüväd pauklahjoid.
Festivalin aigan mäni völ üks’ tarbhaine azjtego. Se oli ištund Arktikan rahvahiden igähine kul’turnimel. Azjtego mäni Valdkundan Duman Rahvahiden azjoiden komitetas. Sihe ühtni läz 45 mest. Niiden keskes oliba festivalin ühtnikad, Associacijan norišton nevondišton ühtnikad da openduzprogramman ühtnikad igähižiden rahvahiden oiktusiden mödhe, mitte läksi täl aigal Moskvas.
Tervhensanoidenke eziniba Associacijan pämez’ da Komitetan pämez’ Il’dar Gil’mutdinov. Azjtegon ühtnikad, nored rahvahiden ezitajad eziniba dokladoidenke, miččiš starinoičiba rados, mitte tehtas heiden regionoiš rahvahiden tugen da kehitoitandan poles. Vepsän kul’tursebran ühtnik Maria Košeleva mugažo ühtni neche ištundaha da starinoiči sigä sebran radon polhe.
Om hüvä, miše nügüd’ tehtas äi azjoid, miše antta norištole voimusen ozutada ičtaze da el’geta, miše heid kundeltas. Se andab norištole toivon, miše tulii aig om heiden käziš.