VepKar :: Texts

Texts

Return to list | edit | delete | Create a new | history | Statistics | ? Help

Tamara Sidorova. Anuksen linnu valmistuu Tazavallan päiväkse

Tamara Sidorova

Anuksen linnu valmistuu Tazavallan päiväkse

Livvi
New written Livvic
Perindö pruaznuija Karjalan tazavallan päiviä eri piirilöis oli pandu alguh nelli vuottu tagaperin. Vuvves 2013 algajen pruazniekkua piettih vuorotellen Priäžäs, Kondupohjas, Sordavalas da Kostamukses. Vuvvennu 2017 Tazavallan päiviä ruvetah pidämäh Anuksen linnas. Anuksen piiri aktiivizesti valmistuu pruazniekkah. Täkse päiviä linnas jo on kohendettu Ližäopastuksen keskus, Luomisruavon da joudoaijan keskuksen huonukset ollah remontiiruittu, ikkunat da veriät ollah vaihtettu. Niilöis talolois roitahgi pruazniekkupivot. Perindöllizesti pruazniekas luajitah linnoin da munitsipalualovehien ozuttelu.
Gagarinan lagevol da toizil pihoil on kohendettu dorogat da kävelytiet. Voiton 30-vuozipäivän, Karl Marksan, Puškinan, Svobodan, Svirskoloin diviizieloin, Proletarskaja -pihoil da Gagarinan lagevol ollah vaihtettu pihafonariloin sellykset. Hyväh kundoh on suadu kenty, kuduale pannah pieni lava dahistourielline kujo”. On ostettu lavakompleksu. Nygöi pannah kundoh linnan puustuo.
Ielleh huavatah kunnostua huogavokohtat Karl Marksan da Uritskoin pihoin tiešuaral, Uritskoin pihan taloin 13a da Suures Ižänmuallizes voinas surman suannuzien Velleskalman lähäl. Linnan halličuksen pluanois on panna hyväh kundoh randupiha pitkin Svirskoloin diviizieloin pihua.
Kul’tuuru- da Kanzallizen poliitiekan ministerstvat yhtes valmistettih pruazniekkupidoloin programmu. Pruazniekan hantuzis pietäh Mečänkuadai-
2017 -kilbu, kyykkä-kižan master-kluasat.
Pietähgi Karjalan tazavallan da Anuksen linnan joukkovehien jalgumiäččykižan dovariššumatču. Paiči sidä, Tazavallan päivänny palkitah molodoloi, kuduat eletäh yhtes jo enämbän 50 vuottu. Pruazniekan aigah ozutetah teatruozutelmu, kuduah yhtyy Karjalan mieliruadojoukkuo da Piiterin luomisruadojoukkuo. Pruazniekan hantuzis pietäh Suomelas-ugrilazen nuorižon festivuali da puuvestoksien festivualiSuarnalline Karjal”.
Päivän aloh pruazniekkukohtis pietäh karjalan neroloin master-kluasat, Čičiliuškutyttiteatru ozuttau interaktiivizet programmat karjalakse, roitah valmistettu kohtat, kus suau ottua kuvua karjalazis ruutis da Suška-fotokuvien ozuttelu.
On hyväksytty Ven’an ennevahnazet linnat -seerin 10-rubl’an raududengan eskiizu, kudai on omistettu Anuksen linnale da sidä kačotah luadie tänävuon.
Anuksen piiri voitti kilvas, kuduan mugah rubieu pidämäh Karjalan tazavallan päiviä vuvvennu 2017 da mennyt vuon on suannuh 25 miljonua rubl’ua. Niilöis oli otettu käyttöh 24 miljonua 314 tuhattu rubl’ua. Tänävuon on allekirjutettu sobimus, kuduan mugah Anuksen piirile annetah vie 25 miljonua rubl’ua abudengua.