Texts
Return to list | edit | delete | Create a new | history | Statistics | ? Help
Anna Deš. Kirjallisušillačču Ivan Savinin šeurašša
Anna Deš
Kirjallisušillačču Ivan Savinin šeurašša
Karelian Proper
New written karelian
Kanšallisien kulttuurien
keškukšešša 13.šulakuuta piettih Paginkanzu-klubin vuoronmukani tapuamini .
Tällä kertua klubin kuččuvierahana oli tunnettu karjalaini runoilija , kirjuttaja ta kiäntäjä , Karjalan Rahvahan Liiton kunnivojäšen Ivan Stepanovič Savin .
Paginkanzu-klubissa on tapana paissa vapuašti ta kertuo šiitä , mistä tahot , ei ole mitänä rajotukšie , šiäntö on vain yksi – paissa pitäy karjalakši , vaikka et ni šuata hyvin paissa , ka šano hoti pari šanua , vain karjalakši !
Livviläini Marija Dmitrijevna tuli enšimmäistä kertua Paginkanzu-klubin tapuamiseh .Marija Dmitrijevnan muamo ei ošannun venäjän kieltä ta pakasi vain karjalakši , a nyt hänen aikuhisekši tullut tytär ei pakaja karjalan kieltä , ka pakinua kuitenki ymmärtäy .Marija Dmitrijevna oli hyvällä mielin , kun piäsi šemmoseh illaččuh , missä voit kuulla karjalan kieltä .
Tällä kertua pakina illačušša koški karjalan kielen statussie , karjalan kielen kirjakieltä , kirjaimikkuo .
– Kaikki meijän murtehet ollah meijän kaunehuš ta rikkahuš , Ivan Savin šano .
– Šuomen kieleššäki on erilaisie murtehie , jotta ei kaikki šuomelaiset ymmärrä toini toistah .
Karjalan kieli kehittyy .Rahvaš , nuoriso tahtou , jotta kielellä olis virallini statussi , mi noštais karjalaisuon tuntuo .
Iče Ivan Stepanovič tiluau karjalankielisie ta šuomenkielisie lehtijä : Oma Mua -, Carelia -, Karjalan Sanomat -, Karjalan Heimo -, Suomen silta -lehtijä .Hiän miellelläh lukou niitä , šentäh kun niissä on äijän Karjalah ta karjalan kieleh liittyvie aiheita .
Ennein rikeneh kiellettih pakajamašta karjalan kielellä .Nyt ei kenkänä voi kieltyä šitä , vain monet karjalaiset šanotah , jotta hyö ymmärretäh kieltä , vain en šuateta paissa .Kieli unohtuu eikä ihmisillä ole kenen kera paissa omalla kielellä .
Miušta ne ollah aivan kekšittyjä šyitä .Mitein šuaha karjalan kieli šäilymäh ?Šamoin kuin ni muita kielijä – oppimalla , harjottelomalla ta pakajamalla .Vet monet ihmiset iče opaššutah enklantie tahi mitänih muuta kieltä , vaikka tiälä Venäjällä ei paissa keškenäh enklannin kielellä .Hyö kačotah vierahie filmijä ilman kiännöštä , kuunnellah musiikkie tmš .
Ivan Savin anto omie neuvoja , mitein voit kehittyä omua kielitaituo : pitäy kuunnella karjalankielistä ratijuo , kaččuo karjalankielisie uutisie , lukie karjalankielistä kirjallisutta , kuunnella karjalaista musiikkie .Još et tiijä mistä alottua – kiänny karjalan kielen aktivistien puoleh , kumpaset aina ollah valmehet auttamah .Karjalan kielen kurššitki voijah olla hyvänä apuna niillä , ket tahotah opaštuo kieltä tahi uuvveštah šuaha muistih unohutetun muamonkielen .
Ivan Savin on hyvilläh , jotta on olomašša šemmoni Paginkanzukerho , minne tulou ihmisie , hyö keškuššellah , paissah omua karjalan kieltä ta ymmärretäh toini toistah .
Ivan Savin kerto runouštuotannoštah .Hiän on alottan kirjuttamistyön 1980-luvulla .Ivan Stepanovič kirjuttau runoja ta proosua šekä kiäntäy karjalan kielellä .Illačun ošallistujat pyyvvettih runoilijua lukomah omie runoja , min hiän luati mielelläh .Ivan Savinin runot ollah kaunehella karjalan kielellä kirjutetut .Runoilija luki vielä Nikolai Rubtsovin Zimn’aja pesn’a -runon ta šiitä laulo šen karjalan kielellä omašša kiännökšeššä .Oma pajo -kuoro niise esittäy tätä lauluo ta ylen šuvaiččou šitä .
Tapuamisešta tuli pieni kirjallisušilta , kuuntelima lisäkši Karjalan kanšalliskielisen ratijotoimitukšen toimittajan , Oma pajo -kuoron laulajan Anna Usovan kaunehie runoja .Oli mukava ta lämminhenkini ilmapiiri !
Kirjallisušillačču Ivan Savinin šeurašša
Karelian Proper
New written karelian