VepKar :: Texts

Texts

Return to list | edit | delete | Create a new | history | Statistics | ? Help

Galina Vasiljeva. Elos eliä – ei peldo poikki proidie

Galina Vasiljeva

Elos eliä – ei peldo poikki proidie

Livvi
New written Livvic
Ehtäl Tamara Nesterenko ei vuottanuh gostii. Näimmö tulen hänen ikkunois da arbaimmo, ku emändy on kois. Inehmine lämmästi otti vastah minuu da naizien nevvoston piälikkyö Svetlana Nikolajevnua. Pagizimmo elokseh nähte, mustelimmo endizii aigoi.
Tamara Mihailovna Nesterenko tuli Karjalah vuvvennu 1974 da jäi tänne elämäh, omembua da parembua muadu häneh niškoi ei olluh. Igävöičitgo Valgoven’ua enziaigua?”, kyzyin minä. Häi vastai: “Tulin tännerounoku ruajuh puutuin, ylen jygei oli minun elos”.
Nuorel inehmizel kolmen lapsen kel, ilmai eländyda ruadokohtua pidi algua oma elos uvvessah. Enzimäi oli pieni pertine da ruado vazatahnuos, kus pidi ruadua viijes aigua huondestu myöhäzeh ildassah. Lapsii pidi syöttiä. Tuli inehmine johtajan Vasilii Petrovičan luo da sanoi: “Andakkua minule fatieru hos mittumas kyläs, minul on kolme lastu!” Kuun peräs annattih yksipertihine fatieru Jessoilas. Tamara ruadoi huogavumattah, erähiči piälimäine buuhgalteri kučui iččeh luo da sanoi: “Zakonan mugah myö emmo voi panna teile čottah kaikkii päivii, ottakkua lebävöpäivät!” Enzimäzen ruadopalkan Tamarale toi kompleksan piälimäine Aleksandr Borisov – 160 rubl’ua! Sih aigah Valgoven’al enämbiä 70 ei maksettu.
Kazvettih nuorembat kaksozet Mihail da Tatjana da vahnembi Aleksandr-poigu. Ruadua oli jygei: jallat ainos rizinsuappualois, puolet aigua tuulenviimas, ga ni kerdua naine ei itketellyhes, tiezi, ku kaikil oli jygei. A konzu lähti iäres vazatahnuos lähembä kodii olijah kompleksah ruadoh, ga kai itki: vazazet hänele rouno ku lapset omat oldih. Ruadajua naistu Tamara Nesterenkuo kunnivoittih ruavos dai administratsies, omas ruavos häi sai Tazavallan kunnivokirjazen.
Ainos rakkahal Tamara Mihailovna sanelou Muatalovusalan ruadajan pruazniekan pidoloih nähte, mittumat hyvät konsertat oldih, ylen vessel oli da hyvä sydämes.
Täs naine vastai hyvän miehenIvan Ivanovič Nikolajevan, kuduanke hyö elettih yhtes 30 vuottu. Ajeltih muarjah da gribah motosiklal, ainos oldih yhtes!
Elos eliäei peldo poikki proidie, hengähtih Tamara Mihailovna da kohendi harmannuot tukat Mihail-poijan kuoltuu.
Tatjana-tytär sai hyvän meedikkualan opastuksen, vai nygöi ruadau Slavmo-maidozavodal. Aleksandr-poigua kyläs kunnivoijah, häi ainos on valmis auttamah rahvastu.
Omale roindumuale Valgoven’ale Tamara ajelou joga vuottu, sie jo ei ole sizärii, ga ollah plem’anniekat. Täs naizel on tavallistu hommua: Korzan kyläs on kyndömuat, joudoaijal häi kävelöy Siämärven rannikole da kaččou uudizii televiizoras.
Midä sinä nevvozit nuorile? kyzyin minä.
Nuoril pidäs suaja lastu, nygöihäi kaikkie on sih niškoi. Se meile puutui gor’ua nähtä, eigo ni ližiä dengua lapseh kazvattamizeh niškoi annettu, eigo ni muaman kapitualua. Eliä on hyvä, olis vai tervehytty, muheloittau Tamara Mihailovna, hyväsydämelline inehmine.