Texts
Return to list | edit | delete | Create a new | history | Statistics | ? Help
Uljana Tikkanen. Mi kiinnoštau nuorie tutkijie ta opaštujie?
Uljana Tikkanen
Mi kiinnoštau nuorie tutkijie ta opaštujie?
Karelian Proper
New written karelian
Perintehen mukah , šulakuušša
Petroskoin valtijonyliopistošša pietäh nuorien tutkijien ta opaštujien tietokonferenšši , missä nuoret ihmiset esitetäh oman tutkimuštyön tulokšie .Tänä vuotena piettih jo 69.konferenšši .Filologijan tietokunnan , itämeren-šuomelaisien kielien laitokšella še oli järješšetty 20.–21.šulakuuta .
Konferenššilla oli kakši ošua .Yksi niistä oli omissettu kielien opaštamisen metodiikalla .Šen aikana filologijan instituutin pedagogisen ošašton opaštujat luvettih omie šeloššukšie .Tutkielmat košettih erilaisien ainehistojen , esimerkiksi , viestimien , interaktiivitaulujen , turismin , elektronilähtehien käyttyö kieliopaštamisešša .Kaikki teemat ollah opaštujien kuršši - ta diplomitöijen teemoina .
– Enšimmäini päivä käsittelöy kielididaktiikan kyšymykšie .
Tätä alua on käsitelty jo kakši vuotta ta opaštujat on kiinnoššuttu täh teemah .Opaštujat iče opaššutah kielie ta heijän kokemuš vaikuttau tutkimuštöih , šelitti konferenššin enšimmäisen ošan johtaja , itämeren-šuomelaisien kielien laitokšen opaštaja Svetlana Korobeinikova .
Tänä vuotena Tamara Ivanovna Staršova olis täyttän 70 vuotta .Tämä konferenšši oli omissettu hänellä .Konferenššin alušša Svetlana Korobeinikova esitti opaštujilla ta konferenššin ošallistujilla šeloššukšen Tamara Staršovašta ta hänen ruavošta .Filologisien tietojen kandidatti , dosentti ta Karjalan opaššušalan anšijoitunut ruataja Tamara Staršova – juuri hänen anšijošta oli peruššettu Itämerenšuomelaisien kielien ta kulttuurien tietokunta , kumpaista hiän rupesi johtamah .Šeloššukšešta opaštujat šuatih tietyä Tamara Ivanovnan pereheštä , elämäštä , toiminnašta , šuomen kielen ta kirjallisuon tutkimisešta .Elämän viimeset vuuvvet hiän oli omistan oppikirjojen toimittamisella .Hänen ruavon tulokšie näkyy nykypäivinäki ta šen anšijošta šuomen kielen opaštamini Karjalan kouluissa tulou helpommakši ta mukavammakši .
– Meijän tietokunta ta laitoš šäilyttäy muistuo Tamara Ivanovnašta , hänen toiminnašta ta ruavošta , ta myö ylen kunnivoitamma häntä , Svetlana Korobeinikova mainičči .
Konferenššin toini oša oli omissettu Itämerenšuomelaisilla kielillä ta kulttuurilla .Šen johtajana oli Anna Saikonen .Šiinä kuulu šeloššukšie karjalan , šuomen ta vepšän kielillä .Opaštajan Marija Kazakovan johtamat tutkielmat košettih šuomen kirjallisutta : starinankirjailija Sakari Topelius , Eeva-Liisa Mannerin runouven erikoisuot , Riikka Pulkkisen Raja-romani , Tove Janssonin Muumilaakso -šarja – nämä ollah kirjallisuštutkielmien teemat .Viimeni niistä on kolmannen vuosikurššin opaštujan Darja Markovan tutkielma .Hiän tykkyäy Tove Janssonista lapšuošta šuaten ta šanou , jotta tutkielma on šiitä , mitein tevokšen teemat vaštauvutah toini toiseh täššä šarjašša .
– Vaikka tämä on lapšien kirja , šiinä on äijän šemmosie aseita , kumpaset on tarkotettu aikuhisilla , Darja korošti .
Joka vuosi eryähät opaštujat tutkitah kielioppie .Anastasija Šestakin karjalankielisen šeloššukšen teemana oli läsintä-šanašto ta niijen šanojen merkityš .Tutkimukšeššah Anastasija käytti erilaisie šuomen , venäjän ta karjalan kielen šanakirjoja .Ta vepšänkieliset tutkimušruavot košettih vepšäläistä naispukuo ta lapšen itku-šanaštuo .
Noin 30 opaštujua esitti omie tutkimukšie konferenššissa , ka pahakši mielekši niijen joukošša ei ollun yhtänä vienan karjalan opaštujua .
Mi kiinnoštau nuorie tutkijie ta opaštujie?
Karelian Proper
New written karelian