Texts
Return to list | edit | delete | Create a new | history | Statistics | ? Help
Galina Baburova. Vepsläižen sarnan festival'
Galina Baburova
Vepsläižen sarnan festival'
Veps
New written Veps
Täl
vodel jo nelländen kerdan Kalag’-külä vastsi vepsläižid erazvuiččiš agjoišpäi ”Vepsläine sarn ”- regionankeskeižel festivalil .
Tradicijan mödhe , festivalin avaižiba lapsed päivkodišpäi .Pičuižed lapsed rohktas vediba ičtaze scenal da čomin ozutiba ei vaiše kelen tedoid , no akt’oran-ki mahtoid .Hö sid’-žo mel’dütoitiba ičheze kacujid , pehmetoitiba ristituiden südäimid .Festivalil-žo täl vodel vägestihe kümne sädaijoukud – nene oma školiden openikad Karjalaspäi , Piterin da Vologdan agjoišpäi .Erased kollektivad oma jo tutabad .Niiden lapsed kaiken aigan ühtneba Vepsän sarnan festivalihe , mitte jo vodes päliči praznuičeb ičeze penikaižen jubilejan .Tetabiden kollektivoiden keskes oma ”Linduižed ”-jouk Vologdan agjan Kujan školaspäi , ”Kelen da tradicijan kaičijad ” Piterin agjan Vidlan školaspäi da mugažo kollektivad Petroskoin suomalaiž-ugrilaižes školaspäi , Šokšun , Šoutjärven da Kalagen školišpäi .Ezmäižen kerdan festivalihe ühtni ”Manzikaine ”-jouk Pöud-lidnaspäi .Vepsän kel’t sigä zavottihe opeta vaiše pol’ vot tagaze .No lapsed jo surel tahtol tuliba Kalagehe ozutamha ičeze mahtoid toižile .
Täl vodel vägestusen festivalil voili sada koumes nominacijas : ”Rahvahan sarn ” (sihe mülüiba vepsläižed sarnad da toižiden rahvahiden sarnad , miččed oli kätud vepsän kel’he ), ”Kus om sebrastuz , sigä om kožmuz-ki ” (se oli omištadud sebrastusele da ristituiden hüvile kosketusile ), ”Vepsläine kaleidoskop ” (sihe mülüiba ilosižed ezitused , anekdotad , kalamburad ).
Festivalin žurijoukule pidi arvostada kollektivoid akt’oran mahtoiš , režiss’oran rados , artistoiden kelen tedos , ezitusen muzikaližes čomiteses da toižes .
Kaik kollektivad ihastoitiba adivoid ičeze čomil ezitusil , erimujukahil sädoil da dekoracijoil .Voib rohktas sanuda , miše lapsiden vepsän kelen tedo-ki oli hüvä .Sidä homaičiba kaik festivalin adivod da tegijad .
Vepsläižen sarnan festival'
Veps
New written Veps