VepKar :: Texts

Texts

Return to list | edit | delete | Create a new | history | Statistics | ? Help

Runofestival’ Podporožjes

Runofestival’ Podporožjes

Veps
New written Veps
Jo kaks’ vot ei ole meidenke tutabad vepsläšt kirjutajad Nikolai Abramovad. Nacein, ei ole niüht vepsläšt, ken ei tedaiži necidä čudokast runoilijad vai hänen sädandradod. Kodima-lehtesen lehtpolil paksus kirjutam hänen polhe. Sid’ kaikutte tedab, miše Nikolai oli eripoline da lahjakaz ristit, sai hüvid satusid kakiš hänen tehtud azjoiš. Voib sanuda, ičeze elos hän ehti sada äi mahtištoid, miččed abutiba hänele säta mugoižid čomid runoid.
Nikolajan muštoks vilukun lopus kut Karjalas, muga Piterin agjas-ki oli tehtud erazvuiččid azjtegoid. Üks’ niišpäi tehtihe Piterin agjan Podporožjelidnas. Nece lugijoiden festival’ tehtihe ezmäižen kerdan, no sen idei tuli mel’he kaikile.
Podporožje-lidnaha tuli lapsid da norid mehid lugemaha ei vaiše Nikolai Abramovan, no hänen armhiden-ki runoilijoiden runoid. Ühtnikad tuliba Petroskoišpäi, Vologdan da Piterin agjoišpäi, toižil sanoil, Nikolajan koditahoišpäi. Ühtnikoiden keskes oliba lapsed da nored, kudambid jagatihe kahthe gruppaha: 12-16-voččed lapsed da 16-24-vozne norišt. Festivalihe ühtni 35 mest. Konkursas oli nel’l’ nominacijad: ”N. Abramovan runod venän kelel”, ”N. Abramoban runod vepsän kelel”, ”Pajod N. Abramovan runoile”, ”Armhad N. Abramovan runoilijad”.
Lapsed ihastoitiba adivoid da kundlijoid čomal lugendal da ozutiba hüvid vepsän kelen mahtoid. Edel ezitust lapsed holduiba, toštiba sanoid. Vepsän fol’klorkeskusen radnik Ol’ga Smirnova tuli festivalile lapsidenke Vidl-küläspäi. Hän sanui, miše ei pagiškoi vepsäks hüvin, no surel tahtol openziba runoid vepsän kelel, da tarbiž sanuda, miše hüvin lugiba niid.
Kaik lapsed saiba diplomid ühtnendas festivalihe. Jogahižes nominacijas jäl’ges pit’käd diskussijad žurijouk valiči parahimid. Jekaterina Butasova sai ezmäižen sijan nominacijasPajod N. Abramovan runoile”. Hän čomin pajatiHändikaz-pajon da abuti ičeleze vätes gitaral. Alina Zenčenko Podporožjen školaspäi da Viktoria Sahnova Petroskoišpäi muga čomin lugiba Jeseninan da Rubcovan runoid, miše kundlijoiden hengiš tegihe läm’. Nened neičikaižed tuliba-ki vägestajikš ičeze nominacijas. N. Abramovan runod vepsän kelel-nominacijas vägesti Polina Karpova Vidlan školaspäi runosVanh koir”. Maksim Trusov sai ezmäižen sijan AbramovanКрестьянский сын-runos venän kelel.
Mugoižen festivalin znamoičend om lujas sur’, ved’ sil om äi tarbhaižid tegendoid. Se abuti tundištoitta lapsid da norid N. Abramovan sädandradonke, levenzoiti lugijoiden tedoümbrust da openzi lapsid navedimha ičeze regionan literaturad da istorijad. Karjalan Rahvahaližen kirjišton radnik Aleksandr Dokučajev toivoti, miše festival’ tehtas kaikuččen voden da tariči vajehtada sen nimed: ”Hän meiden keskes elivajehtadaHän meiden keskes eläb-nimeks.