VepKar :: Texts

Texts

Return to list | edit | delete | Create a new | history | Statistics | ? Help

Mil eläb škol?

Mil eläb škol?

Veps
New written Veps
Uhokun 10. päiväl Prezidentan valdakaz ezitai Aleksandr Beglov da Karjalan pämez’ Artur Parfenčikov vastsihe rahvahaližiden kundaližiden sebroiden ezitajidenke. Vastuz mäni Petroskoiš Suomalaiž-ugrilaižes školas.

Školas Aleksandr Beglov da Artur Parfenčikov kacuiba openduzklassoid, nügüdläižen kelen radhonusen da kosketihe openikoidenke. Opendai Jelena Pankratova starinoiči rahvahaližiden keliden openduzprogrammoiš, miččid kävutadas školas.
Jo augotižškolas lapsed zavodiba opeta vepsän, karjalan da suomen kelid. Školan opendajad vaumičeba keliden openduz- da abukirjoid. Suomalaiž-ugrilaine škol da Suomen školad tegeba ühthižid projektoid, niiden keskes om opendajiden da openikoiden vajehtuzprogramm. Kut sanui Jelena Pankratova, openikad jo teravas ajaba susedmaha. Mugoine voimuz kosketadas verazmaiden ühtenigäižidenke om lujas tärged lapsile, kudambad opendaba suomen kel’t. Aleksandr Beglov küzui lapsil: ”Om-ik jüged heile opeta suomen kel’t?”, no lapsed sanuiba, miše jügedusid ei ole.
Sen jäl’ghe školan kirjištos mäni vastuz rahvahaližiden kundaližiden sebroiden ezitajidenke. Aleksandr Beglov sanui, miše hänele tuli mel’he openduzprocessan tegemine, opendajiden tedomaht da openikoiden radonnavedind. Hän mugažo ližazi, miše rahvahiden keliden da veroiden kaičend mas om lujas tärged azj.
Kut sanui Artur Parfenčikov, Karjalas eläb äi rahvahid. Täs hüvin tehtas Rahvahaližen politikan strategii, miččen pätegendoin oma rahvahiden ičetundmusen vahvištamine da kožmuz rahvahiden keskes. Karjalas necen strategijan mödhe radab 26 rahvahan ezitajad, kudambad oma tehnuded 80 kundališt sebrad. Niiden keskes om 36 karjalaižiden, vepsläižiden da suomalaižiden, a mugažo igähižiden venäläižiden sebrad.
Mugažo pämez’ ližazi, miše Karjalas hüvin tugetas rahvahaližid kelid, etnožurnalistikad, etnografijad, literaturan kehitoitandad da äi toižid azjoid, miččed om sidotud kelen da rahvahan kaičendaha da kehitoitandaha. Hän mugažo homaiči, miše sociologižen küzelusen mödhe 82, 9% küzeltud vastsi, miše rahvazkeskeižed kosketused Karjalas oma hüväd. Karjalaižiden, vepsläižiden da suomalaižiden enambištole mugažo om mel’he, miše heil oma oiktused da voimuz kehitoittas.