VepKar :: Texts

Texts

Return to list | edit | delete | Create a new | history | Statistics | ? Help

Maria Filatova. Uz’ dorog Šoutjärves

Maria Filatova

Uz’ dorog Šoutjärves

Veps
New written Veps
25. päiväl heinkud Šoutjärv’-posadas oli avaitud kohetud dorogan pala. Te oli kohetud Sijaližiden tomotusiden programman mödhe.

Pahad, muretud ted Änižröunas om amuine problem. Om tetpas, miše tägä radaba kivisaskelmižen karjerad. Kormmašinad vedäba surid kivid i murendaba dorogad. Sikš eskai pen’ kohetud dorogan pala om sur’ ihastuz külän eläjiden täht.
Šoutjärves om dorog, mitte jo amu varasti kohendust. Se oli saudud 30 vot tagaze. Nece te vedäb bolnicannoks, miččes saba abud susedoiden küliden eläjad-ki. Kevädel da sügüzel vihmud upoteliba ted i ajada sil oli jügedan azjan. Nügüd’ se om kuivatud da sille om pandud uz’ asfal’t. Anastasia Konošenko sanui: ”Minä elän Šoutjärves jo viž vot, radan tägälaižes školas. Meiden posadas oma pahad dorogad i minä olen ihastusiš, miše dorogad kohetas i nügüd’ om hot’ üks’, no hüvä dorog posadas. Minä voin tütrenke kävelta tägä, voin laukha ajada necidme dorogadme”.
Uz’ dorog oli tehtud Šoutjärven eläjiden abul. 121 mest, a nece om kaikutte kümnenz’ külän eläi, andoi den’goidken äjak voi. Kaiked oli keratud läz 200 tuhad rubl’ad. Tošt raha-abud oli sadud külän da Karjalan valdkundan büdžetaspäi. Šoutjärven pämez’ Irina Safonova sanui: ” ühtnim neche programmaha jo erasid kerdoid, no vaiše täl vodel vägestim i olem tehnuded necen radon. Kohetud dorogan piduz om 230 metrad. nägem, miše nece programm radab. Meiden planoiš edemba-ki ühtneda neche programmaha. Tahtoim koheta voinkaumišton da tehta čoman tahon praznikoiden täht”.
Sijaližiden tomotusiden programm radab Karjalas jo nel’l’ vot. Täl vodel oli anttud rahad 70 projektale. Siš lugus om Kalagen kul’turpert’. Siš linneb tehtud lämbitusen sistem. Programm andab hüvid satusid. Toivom, miše se tob vepsän male völ äi hüvid azjoid.