VepKar :: Texts

Texts

Return to list | edit | delete | Create a new | history | Statistics | ? Help

Amuižed živatad

Amuižed živatad

Veps
New written Veps
Tervhen! Minä olen Andr’uša Žukov, minei om 6 vot. Elän Petroskoiš. Minä tahtoin starinoita teile dinozavroiden polhe da ozutada ičein bobaižid. Minai om äi dinozavroid da kirjoid heiden polhe.
Dinozavrad oliba lujas amuižed živatad. eliba meiden kosmosmal 250-65 millionad vot tagaze. Siloi völ ei olend ni mehid, ni nügüdaigaližid živatoid. voim tedištada, miččed oliba dinozavrad vaiše paleontologižiden löudmusiden pohjal. Man erazvuiččiš tahoiš löutas amuižiden živatoiden luid. Tedomehed-paleontologad oppiba heid, keradaba heiden rungišt da sanuba miččed dinozavrad oliba da mitte oli heiden elo.
Dinozavrad eliba kaikjal: lendiba taivhas (pteradaktil’, pteranodon, ramforing), eliba meres (pleziozavr, ehtiozavr, leoplevrodon) da käveliba mal (brontozavr, ankilozavr, iguanodon). Oli lujas äi erazvuiččid roduid: oli ani penid živatoid i mugoižid sur’kuluid. Dinozavrad oliba kazvmuzsöjad (triceratops, stegozavr, diplodok) da lihansöjad (gargozavr, dimitrodon, veloceraptor). Kaikid suremb lihansöi oli tiranozavr Reks. Hän käveli kahtel tagajaugal, a ezižed oliba lujas pened. Tiranozavral oli vägev händ da teravad hambhad.
A kaikid suremb dinozavroišpäi oli pit’kkaglaine da pit’khändaine kazvmuzsöi argentinozavr, hänen voili olda 35 metrahasai, a jügeduz oli 100 tonnahasai. Nece dinozavr sai ičeze nimen tahon nimespäi, miččes oli ezmäižen kerdan löutud.
Dinozavroiden mir oli lujas melentartuine, siloi londuz, kazvmused da oli ani toine. Kaikjal eli čudukahid živatoid. Nügüd’ voim nägištada necidä mirud kirjoiš da fil’moiš.