VepKar :: Texts

Texts

Return to list | edit | delete | Create a new | history | Statistics | ? Help

Runoil täuttud hänen heng

Runoil täuttud hänen heng

Veps
New written Veps
Keväz’kun 1. päiväl vodel 1953 Piterin agjan Mäggär’-külähä om sündunu Val’aneičukaine. Hänen tat oli geologan i eli kanzanke sihe aighasai, konz tütrele täudui koume vot. Mam radoi kolhozas. Val’ad kazvati baboi, Jevdokia Ivanovna Bulatova.
Külän akad paksus keradelihe heiden pert’he besedoile, ken kudoi, ken kezerzi. Pen’ Val’aine kundli heiden paginoid, sarnoid, pajoid da elon azjoid. Val’a äjan küzeli babal, i se surel tahtol starinoiči vunukale külän polhe, kut ende eletihe, kanzan istorijad. Baboi otli neičukaižen pühile praznikoile, kus pühitadihe vet da kül’bihe, a jäl’ghe käveltihe kaumoile.
Mäggäres Val’a openzihe nel’l’ vot. Videndespäi kahesandehe klassahasai hän openzihe Järviš. A 9.–10. klassad oliba jo Vidlas. Vodel 1971 Valentina ajoi Piterihe, kus openzihe tehnikumas (Učetno-kreditnii tehnikum). I jäl’ghe hän radoi bankas.
Vodel 1975 Val’al om sündunu poig. Vodelpäi 1979 Valentina Vasiljevna zavodi rata projektoiden tegijas institutas smetčikan. Jäl’ghe hän openzihe ekonomistaks i radoi päbuhgalteran.
Vodel 2004 Piter-lidnas tehtihe kundaline organizacii, miččen nimi omPiterin vepsläine sebr”. Valentina Lebedeva tegihe sebran vice-prezidentaks. Hän holdui vepsän keles, tahtoi, miše se hätkemba eläiži. Internetas om tehtudВепсский край-grupp, miččes Valentina om administratoran. Hän ližazi sinna melentartuižid tekstoid i gruppaha ühtni äi lugijoid. Nügüd’-ki Valentina aktivišesti radab internetas i löudab äi hüvid temoid vepsläižiden kul’turas, elos da keles.
Muga tegihe, miše Valentina Vasiljevna pördihe sures lidnaspäi elämaha kodiröunaha. Nügüd’ hän eläb Kurb-küläs, kus eli hänen mam.
Vodel 2012 om paindud Valentina Lebedevan ezmäine vepsänkeline kirjLendi linduine”. Se oli tehtud vepsläižiden kirjutajiden kongressaks, mitte mäni Vologdas. Vodel 2015 läksiУдивительный народ-kirj, miččehe om keratud Valentinal kirjutadud runoid da sanutesid, da mugažo ližatud rahvahalpäi keratud fol’klorad. Se om tehtud kahtel kelel: vepsäks da venäks. Koumanz’ hänen kirj omВепсы деревни МягозероПанфилки из Мышкина” (v. 2016). Sihe om keratud istorižid tedoid, fotokuvid da dokumentoid Mäggär’-külän polhe.
Valentina Vasiljevna radab nügüd’-ki: kirjutab, keradab materialoid. Toivotam hänele uzid meletusid, tahtod da väged mamankelen kaičendrados!