VepKar :: Texts

Texts

Return to list | edit | delete | Create a new | history | Statistics | ? Help

Anni Vlasova. Piäjärven Karjalaisen pirtin pitoja

Anni Vlasova

Piäjärven Karjalaisen pirtin pitoja

Karelian Proper
New written karelian
Enšin Piäjärven koululaiset, kumpaset tutkitah Miun Karjala -ainehta oman opaštajan Marina Kirilinan kera, šekä vierailijat opaštajat Louhen piirin muista paikoista käytih tutuštumah vanhoih käsitöih.
Myö näyttimä heilä, kuin kesrätäh lankua rukilla lampahan villašta, kuin kuvotah räšymattoja kankašpuilla, a šiitä lapšet ta opettajat mielelläh reissatih iče kartata ta kutuo. Kertoma toisista käsitöistävakkojen kutomisešta paperipajušta, tuohešta, pärieštä. Oksana Logutova opašti kuklojen ompelomistamonet šuurella ilolla kerittih luatie omat kuklat ta otettih ne matkah.
Opettajat ihmeteltih, kun hyö ei oltu kuultu, jotta Piäjärveššä on tämmöni etnokulttuurikeškuš ta luvattih tulla omien koululaisien kera. Ka terveh tulla, myö olemma vain hyvillänä.
Karjalan ta vepšän kirjakielen päivänä kirjuttima karjalankielistä šaneluo. Tapahtumah yhyttih kielikurššien opaštujat. Niijen joukošša on nellä venäläistä! Tuntuu, jotta kielitaito on vielä kehitettävä ta kehitettävä! No še on toini asie.
Näyttimä Valentina Saburovan kiäntämän pienen Meččämökkinäytelmän. Šepä oli yllätyš! Tuli mieleh jatkua tätä hauškua työtä, näinhän on mukava oppie kieltä.
Tavan mukah joima čäijyö ta ilomielin kuuntelima Vieno Vlasovan kaunista ta puhašta karjalankielistä pakinua tovellisešta tapahtumašta Niskan kyläššä. Kaikilla miellytti tämä pakinaklubi, šeuruavan lupasima valmistua Voitonpäiväkši.