Texts
Return to list | edit | delete | Create a new | history | Statistics | ? Help
Böbökän Johor
Böbökän Johor
Livvi
New written Livvic
Vahnat
rahvas meil mustellah Böbökän Johorua , kudai oli köyhy da ei ni ylen ruadai , a bohattua tahtoi .
Paistah , buiteku hänel rubei hambahii kivistämäh .Lähti Johor niidy kiškottamah suureh linnah .
Tuli kiškojan luo , a den’gua ičel ei olluh ni groššua .Istuihes ikkunan alle , šokkua käil pidäy .Kačahtihes ikkunahpäi dai nägi , kui čoma mies valgielois sovis kučui iččeh luo voimattoman , kui kaččeli suus hambahii , midälienne kirjutteli bumuagah da andoi sen voimattomale kädeh .A voimatoi oijendi hänele viizirubl’ahizen .
Johor ku havačui !Unohti oman kivun , meni kniigulaukkah , osti valgiedu bumuagua , peron , černilät da hakkai kodih , omah meččykyläzeh .Rubei smiettimäh — kui olis rahvahale parembi sanuo , što häi on nygöi douhturi .Käi yhten kirjahmaltajan luo da kyzyi händy kirjuttamah : “Douhturi Böbökän Johor (tiedoiniekku )”.Hieruloishäi sih aigah enämbäl tiedoiniekkoi uskottih .
Jo tossupiän Johoran luo tuli 70-vuodine Malan’n’u-buabo .Johor istutti hänen , käski avata suun , kačoi sinne kodvazen , sit otti bumuagazen , midälienne piirdeli sih da andoi buabale .
Tahtoi Malan’n’u-buabo sanuo , ku hänel vaččua kivistäy , ei hambahii suus ole .Johor vai burahtih :
— Pane vai viizi rubl’ua stolale .
S it se buabo meni aptiekkah , andoi Johoran lapun .Sie kodvan arbailtih — midä ruadua , sit nagrokse annettih Malan’n’ale ačanpehmityslekarstvua .Naine toven tossupiän parani .Kogo hieru sai tiediä uudeh douhturih näh :
— Kačoi suuh , a nägi vaččuvoimattomuon .
Erähänny piän tulou Johoran luo bohattu nuori mies .Häi tahtoi naija , ga kunnelienne hävii hänen uveh .Ei ehtinyh nimidä sanuo , ku Johor istutti händy , käski avata suun , kirjutti lapun da käski panna stolale 10 rubl’ua .
Nuori mies kodvazen smietti — midä lapun kel ruadua , sit vedi sen aptiekkah .A sie jo oldih harjavuttu andamah Johoran lappuh vačanpehmityslekarstvua .
Nuori mies sen kerras ryyppäigi , lähti kodih .Kodvazen peräs lekarstvu andoi ičes tiediä .Mies rubei eččimäh , kunne vois mennä peittoh .Meni sillan alle .Ga kummua sanot : sillan al seizoi hänen uveh !
Vot nenga bohatui meijän Böbökän Johor , tiedoiniekku .
Böbökän Johor
Livvi
New written Livvic
—
—