VepKar :: Texts

Texts

Return to list | edit | delete | Create a new | history | Statistics | ? Help

Hauvoilla ahventa pyytämäh

Hauvoilla ahventa pyytämäh

Karelian Proper
New written karelian
Vienan Karjalašša kalua pyyvvetäh monin keinoin, ka višših kaikista mielusin ta tuntehellisin kalaššuštapa alkau kešän lopušša, konša käyväh šyvillä hauvoilla ahventa pyytämäh.
Ihan lapšešta šuahen karjalaiset opaššuttih kalaššušta hauvoilla. Rahvaš ne aina šanottih, jotta lapšet ollah kaikista ošakkahimmat hauvoilla kalaššukšešša. Šiinä käyttämät vehkehetkipohjaonketollah hyvin yksinkertaset, jotta niitä pieniki kalaštaja vaivatta šuattau käyttyä.
Ahvenet ta varšinki šuuret ahvenet, tullah hauvoilla elokuun puolivälissä, konša šemmosilla šuurilla järvilöillä, kuin Kuittijärvi, mujeh alkau liikkuo kutupaikoilla. Ahven innokkahašti ajelou näitä mujehparvija, mit liikutah vesistöjen šyvimmissä paikoissa. Kalaštajat šanotah, jotta šinä kautena ahven on ylen ahneh šyömäh ta mielelläh nielasou kaikki maimat, mit tullah šillä vaštah.
Rikeneh šattuu niin, jotta onkeh puuttuu ahven kita täynnä mujehta. Hauvoilla onkimiseh ei tarviče mitänä muuta kun pohjaonki, kumpasešša on luja šiima, jykie paino ta pienikokoni uissin šekä hyvät šyöttiet. Elokuušša Kuittijärvellä ušeičči tuulou ta šiä on ylen vaihtelija, šentäh kannattau ottua matkah pitkä pakšu nuora ta kunnon ankkuri, jotta veneh pisyis paikoillah.
Kešän lopušša ta ihan mujehkuvun loppuh šuaten ahven hyvin puuttuu 9-12 metrin šyvyöltä. Nykyset kalaštajat ečitäh hautoja ta kala-apajie šyvyön tutkintalaittehien avulla. Ka ei ne nykyaikaset laittehet kaikičči auteta: ahven ei pisy yhellä paikkua, še aina liikkuu, šiirtyy yheštä paikašta toiseh konša pienemmissä, konša šuuremmissa parviloissa. Kaikista šuurimmat kalat tavallah liikutah yksitellein. Kilon tahi yli kilon ahvenšualis on hyvin harva lykky äšen kokenehilla kalaštajilla.
Tänä vuotena šattu ylen kuiva heinäkuu ta šen takie kaštematojen miärä jyrkkäh väheni. Šentäh kalaššušreissuo iellä kalaštajilla oli työpaikka kuni šuatih kaivua tarpehekši šättie.
Muiteinhan hauvoilla onkimini, još kalaštaja šattuu hyvällä paikalla, tuou äijän hyvyä mieltä. Hauvoilta šuau hyvänkokosie ahvenie, šuurie ta voimakkahieihan oikeita petokaloja! A kuin makie uuhha niistä tulou! Yhtä makiet ne ollah šuolattuna ta šavuššettunaki.