VepKar :: Texts

Texts

Return to list | edit | delete | Create a new | history | Statistics | ? Help

Meijän “Anni-ämmö”

Meijän “Anni-ämmö”

Karelian Proper
New written karelian
Šajekuun lopušša jyškyjärviläini Anna Ivanovna Karel’skaja juhli 90-vuotispäivyäh.
Anna Ivanovna on šyntyn 23. šajekuuta 1928 vuotena Jyškyjärven kyläššä. Hiän kerkisi käyvä koulun nellä luokkua, kun alko Isänmuallini šota. Kaikki kyläläiset evakoitih Arhankelin alovehella. Vuotena 1943 hyö šuatih lupa myöštyö Karjalah, ka kotipaikalla heijät ei piäššetty. Hyö mäntih Kemin piirin Kuren kyläh. Anni potruškojeh kera puattih heimolaisien luokše Puanajärveh ta šielä kenttäšairalašša autettih hoitamah huavottunuita šotilahie. Šuomelaiset pommitettih Šuopaššalmie ta huavottunuita oli äijän. Niitä peštih, šivottih huavoja ta toimitetth Kemin šotilaššairalah.
Šiitä Anni šai kučun Papinšuaren tehtahan kouluh ta läksi opaštumah puisenluatijakši. Šielä hiän otti vaštah Šuurta Voittuo. Šovan loputtuo Anni myöšty kotikyläh, alušta kolme vuotta ruato kolhosissa. Vuotena 1948 kyläššä avattih šeimi ta Anni otettih šinne keittäjäkši. Myöhemmin šeimin johtaja mäni šynnytyšlomalla. Anni miärättih väliaikasešti šillä paikalla, ka hiän ruato šiinä työššä 40 vuotta, ihan 1983 vuoteh šuaten, kuni ei piäššyn pensijalla.
Anna Ivanovnalla ei ole omua perehtä. Anni oli elän Marfa-täjin kera, kumpani oli pieneštä šuahen kašvattan hänet. Nyt Anna Ivanonva eläy talvet Koštamukšešša Antoninaveikontyttären luona ta kešäkši tulou Jyškyjärveh.
Himottais toivottua Anna Ivanovnalla pitkyä ikyä ta lujua tervehyttä, jotta hiän vaštuais vielä monen monta kešyä omašša kotikyläššäh.