Texts
Return to list | edit | delete | Create a new | history | Statistics | ? Help
Viimeni kerta
Viimeni kerta
Karelian Proper
New written karelian
Talvi
loppu .Lämmin kevättuuli ajo pilvie taivahalta .Lumi muklahti ta kinokšet šulattih päiväseššä .Enšimmäisekši ilmeššyttih näkyvih korkiet kiviroukkivot peltopientarehilla .Jovet ta järvet tulvittih .Šuvešta lenti loppumattomašti lintuja šuurina parvina .Joučen - tai hanhipari liitäyty hil’l’asella šalolammilla , mistä še löytäy entisen , rauhallisen pešäpaikan .Monet šoršaparit laškeuvuttih loivašti liitelen kotirannan poreih .
Oli tyyni , lämmin ilta .Kaikki merkit ošoitettih , jotta enši yönä pitäis mečon laulua .
Petri Ivanov on mečäštäjä .Hiän viuhkasi kintahalla tuntehilla ta romantiikalla – piäasiena on varovaisuš : meččäh mänö , šualistamini ta kotih myöštymini .Nyt hiän piätti hämärän tullen täyttyä meinaukšen .
Reppu šelkäh ta pyššy olalla .Mäntyöh pihalla Petri kierti matan varrella olijat talot ta smietti : “Kaikki käypi hyvin , enhän ole enšikertalaini ”.
Hiän tiesi mečon šoitinpaikat ihan tarkkah ta piätti männä šuorua piätä Huapapurolla .
Petri yritti tulla paikalla varovašti , jotta ei pöläššyttyä meččoja , rikeneh pietty , kuunteli , pani kopran korvan tuakše , jotta paremmin kuulla , veti henkie ta liikahti tuaš varovaisešti , otti pari hiipimäaškelta šivulla piäštyäkšeh šuuren puun šuojah .Kylmä alko tärisyttyä .Hiän nilotti lähiseštä koivušta pintatuohta , keräsi kuivie kuušen okšie ta meinasi virittyä pienen lämmittäjän nuotivon .Hiän ei kerinnyn piirtyä tulta kun kuuli ieštä šuonlaijašta kolahukšen ,
Enšimmäiset hyppyaškelet tunnuttih kevyiltä , joka lihaš vartalošša jännitty .Tuaš väršy ta hyppy .šiitä toisen …vielä vähän ta jo voit kuulla koko väršyn .Mečäštäjä otti ašien kainaloh , hänen šilmät pyörissyttih ta hiän oli jo valmis hyppyh .
Mitä kummua ?Viime hyppyö luaties’s’a hiän kuuli liikettä päinvaštaselta šuunnalta .Višših šielä oli toini mečäštäjä , kumpani hiipi šamalla mečolla .Hermot jännityttih , polvet hytistih , henkie šalpasi …Meččo laulo melko hyvin .Luatien vielä kolme hyppyö Petri tunti olijan ampumamatan piäššä .Hiän kurkisteli kuušen okšien šuojašta ta huomasi mečon istujan šuuren männyn latvašša .Še tunti , jotta ahistaja läheštyy ta hörkisty , kakla etehpäin ojentuan še oli valmis pyreytymäh lentoh .Mieš nošti varovašti pyššyn , otti mečon tähtäimeh ta paino liipačinta .Laukauš kajahti , meččo vieri okšie myöten ta jyšähti muaha .Petri oli hellittömän iloni , olihan meččo kuiteski hänen .Kiirehtimättä hiän läksi kävelömäh kohti šualista , kun huomasi äkkie ieššä pevon .Muutoman metrin piäššä häneštä nousi takajaloillah kontie .Še irvisti ilkiešti ta mörisi hirviellä iänellä .Kontie laškeutu muaha kähissen ta nousi tuaš pistyh roikuttuan kynšissäh meččuo .Petri kirvotti haulikon käsistäh ta läksi pitin aškelin kohti kotie .
Kontie tuntu yllättäjän ihan peräššä .
Vaštah tuli puro , min yli piti juošša yhtä hirttä myötä .Petri työnty rohkiešti hirrellä , ka jalka luiskahti , ta hiän mäčkähti puroh jotta vesi ruisku .Onnekši puro ei ollun šyvä , vettä vain kainaloih šuaten .Hiän šai luahistuo iččieh toisella rannalla ta jatko matkua šamalla vauhilla , šentäh kun kontie niin ni tulla kolisutti vain jäleššä .
Vielä kotiportahilla Petri kuuli šamua kolinua .Šuin päin hiän lennätti šinččih ta paukahutti ulko-oven kiini .Vašta huiskuttuan reppu nurkkah hiän huomasi : kattila ta kuppi ne repušša kolistih .
Akka arvasi , jotta tapahtu mitä lienöy pahua ta alko utella :
– Missäpä šiun pyššy on ?
– No anna kun vejän henkie , Petri töräsi ta lisäsi :
– Olin jo mänöššä kotih , kun vaštah tuli arvuamatta kolme mieštä .
Hyö vuajittih miulta ašienkantolupua .Kun en voinun šitä heilä esittyä ta kun kevätmečäššyš on kielletty , hyö otettih miun aše ta alettih kirjuttua miula šakkuo mečäššyššiäntöjen rikkomisešta .Noššin heilä hattuo ta otin rohkiešti kaunehen juokšun .Varasin taka-ajuo , hyppäsin jokeh ta uin šen poikki , ta piäsin šiitä heistä eroh …
Kun akka ei šanon šiih mitänä , vain šeiso äkäsennäkösenä iänettä , kaččo Petri iänellisešti huomauttua :
– Niin še !Ka tämä oliki šiksi tovella viimeni kerta , kun kävin mečällä kiellettyh aikah !
Viimeni kerta
Karelian Proper
New written karelian
–
–
–