VepKar :: Texts

Texts

Return to list | edit | delete | Create a new | history | Statistics | ? Help

Maria Košeleva. Ken paiči meid?

Maria Košeleva

Ken paiči meid?

Veps
New written Veps
Sügüzen lopus jo nelländen kerdan mäni Igähižiden rahvahiden norišton forum. Nece om forum, kuna keradasoiš nored Pohjoižen, Sibirin da Edahaižen Päivnouzman ezitajad tundištamhas toine toiženke, rahvahidenke da kul’turanke da istorijanke. Forum vedetihe 25. – 29. kül’mkud.
Jogahižen voden sija foruman täht om erazvuitte. No kaikuččen kerdan se om sija, kus eläba igähižiden rahvahiden ezitajad. Nelländen foruman täht valitihe Piter da Piterin agjan Repino-sija. Piter valitihe sikš, miše sigä om Piterin Gercenan pedagogine universitet, kus om Pohjoižen rahvahiden institut. Institutas opetas lujas äi igähižiden rahvahiden ezitajid kaikjal Venämalpäi. Sigä oppidas neniden rahvahiden kel’t da kul’turad.
Forum jagatihe kahthe palaha. Kaks’ ezmäšt päiväd ühtnikad eliba Piteriš da avaiduz mäni Gercenan universitetan päsauvotuses. Sigä-žo mäniba ezmäižed mastar’-klassad da treningad. Ehtal foruman ühtnikoiden täht tehtihe melentartuine kvest Piteridme. Joukud läksiba kacmaha lidnan keskusen melentartuisijoid, tegiba fotokuvid da andoiba vastusid küzundoihe. Kacmata kül’maha tulleižehe kvest tuli mel’he kaikile, ved’ äi ühtnikoid oli Piteriš ezmäižen kerdan. Toižel päiväl Gercenan universitetas oli avaiduzkoncert, kus eziniba Pohjoižen rahvahiden institutan kollektivad. Koncertan jäl’ghe ühtnikad ajoiba Repino-sijaha, mitte om čomal Suomen lahten randal. Sigä koume päiväd nored rahvahiden ezitajad saiba uzid tedoid rahvahiden polhe.
Täl vodel foruman tem oliOpenduz’ da norištigähižiden rahvahiden tüvi”. Todeks, openduz om lujas tärged azj ei vaiše igähižiden rahvahiden täht, a kaikiden rahvahiden täht. Foruman aigan pagištihe openduses, siš, kut rahvahiden kelid kehitoittas regionoiš, pagižeba-ik rahvahad niil, pagižeb-ik norišt ičeze kelil da om-ik nece tarbhaine azj. Ühtel panel’diskussijal ezini Venäman kodikeliden opendajiden associacijan pämez’ Zinaida Strogalščikova. Hän starinoiči norištole hüväs kodikeliden opendamižen mahtištos.
Jäl’gmäižel foruman päiväl oli Associacijan norišton sovetan ištund. Nored regionoiden ezitajad starinoičiba parahimiš azjtegoiš, miččid tegeb norišt igähižiden rahvahiden elotahoiš, kut se kehitoitab ičeze kul’turad da kel’t. Oli čoma nähta da kundelta, kut nored 20-voččed ristitud ičeze vägil tegeba surid azjtegoid, kirjutaba ičeze kelel, opendaba da oppiba niid.
Karjalad forumal eziti koume neidišt Petroskoin universitetaspäi: baltianmeren-suomalaižiden keliden kafedran vepsän kelen koumanden voz’kursan openik Jelizaveta Makarova, ezmäižen voz’kursan aspirant Darja Švecova da nelländen voz’kursan aspirant Maria Košeleva.
Toižel vodel vedetas jo videnz’, jubileiforum. Čoma om, miše se vaiše kehitoitase voz’ vodespäi, kaiken aigan se vedetas erazvuiččiš sijoiš, kaikuččel vodel om uz’ tem da ühtnikad kaikuččel vodel oma uded. No kaitas üks’ tarbhaine azjforum andab norile rahvahiden ezitajile vägid da uzid melid, miše norišt voiži kaita da tehta tulijad aigad ičeze rahvahan täht. Ved’ kut sanuiba foruman ühtnikad – ”Venäman pohjoine om noriden kädes”.