Texts
Return to list | edit | delete | Create a new | history | Statistics | ? Help
Kaikam ičemoi jurid!
Kaikam ičemoi jurid!
Veps
New written Veps
Jo
äjak -se vot Vidlas radab ”Kodijured ”-paginklub .Sen tegemižen tomotajan oli Nadežda Mihailovna Koval’skaja , Vepsän fol’klorkeskusen varapämez’ .Ristitud tuleba vastusele kerdan kus .Ühtnikoiden keskes oma ristitud , kudambad pagižeba vepsäks i eläba läheližiš küliš Vidlaspäi : Nemžas , Pecoilas , Mäggäres , Šondjalas , Ladvas , Vil’hälas .Nügüd’ niiden lugu om jo enamb 30 mest .
”Kodijured ”-paginkluban ohjandai om Svetlana Trifanova .
Hän lujas hüvin pagižeb kodikelel , sikš ku hänen vanhembad oma vepsläižed Šondjalaspäi .I tähasai heiden kanzas pagištas vepsäks .Mugažo Svetlana openzi vepsän kel’t kursil , kus tundištihe Zinaida Ivanovna Strogalščikovanke .Zinaida Ivanovna nevoiki otta händast radole Vepsän fol’klorkeskusehe .I sid’ keskuses kehuškanzi rad .
Paginkluban vastusile zavodihe tuleskelda ei vaiše vanhad ristitud , no noredki .Kaikuččel vastusel ottas paginaks uz’ tem , ozutesikš , ”Minun hengen purded ”, ”Uz’ voz’ – sarnoiden aig ”, ”Sündumad ” i toižed .Ristitud pagižeba kodikelel ičeze penes kodimas , veroiš i tradicijoiš , praznikoiš , miččid ende vedetihe heiden küliš .Starinoitas pühiš sijoiš , časovniš , miččed seižuba kaikuččes küläs .Paginkluban ühtnikad hüviš meliš johtutaba ičeze laps’aigad , ičeze ezitatoid .Vastusil vepsän pagin kulub , kuti keväz’ojaine , i henges necišpäi tegese läm’ .Om mugoine tundmuz , kuti sinä putud laps’aigaha , konz oliba eläbad völ sinun baboid i dedoid , a vanhembad oliba nored .
Vilukus Vepsän fol’klorkeskuses mäni lujas läm’ vastuz .Necil kerdal vastusen arvokahin adivoin oliba Valentina Vasiljevna Lebedeva i runoilijan Nikolai Abramovan mam Maria Aleksejevna Abramova .Valentina Lebedeva starinoiči ičeze udes kirjas , mitte läksi eloho edel Ut Vot .Paginkluban ühtnikad pagižiba Valentina Lebedevanke ičeze kodikelel , küzuiba hänel receptoiš , miččed om pandud kirjaha , iče jagoihe toine toiženke paštatesen tegemižen peitusil i starinoičiba toižiš vepsläižiš sömižiš .Kaikutte necen vastusen ühtnik sai lahjaks necen kirjan avtoran käzikirjutesenke .Vastuz mäni sünduman aigan , sikš pajatadihe pajoid i lugetihe runoid .Gul’a Polivanova čomin pajati pajon Nikolai Abramovan runole .Mugažo kuluiba Nikolai Abramovan runoid , miččid lugi hänen mam .Mugažo Maria Abramova pajati pajon , miččen kirjuti iče .
Kaikutte paginkluban ühtnik om sidä mel’t , miše pidab paksumba tehta mugomid vastusid , pagišta ičeze kelel ei vaiše vastusiden aigan , no kodiš-ki ičhižidenke .Voib olda , siloi mö voim kaita vepsän rahvahan kul’turad da kel’t , kaičem ičeze jurid , ved’ ei muite paginkluban nimi om ”Kodijured ”.
Toine vastuz linneb 28.uhokud , sen tem linneb ”Vepsän kanzan verod ”.Sil mö nadeimoiš kulištada neniš veroiš i tradicijoiš , miččid kaitas kanzoiš ezitatoilpäi .
Kaikam ičemoi jurid!
Veps
New written Veps