Texts
Return to list | edit | delete | Create a new | history | Statistics | ? Help
Gromova Ljudmila . Lykky on kylä
Gromova Ljudmila
Lykky on kylä
Karelian Proper
New written Tver
Kuin
kyžyzin keldä-olgah omašša kodikyläššä , midä že šana "lykky " on , voizin kuulla :
– Et mingo tiijä , ali muisson mänetiit – Lykky on kylä !
Toveštah , kilometran piäštä Prudovalda Tolmaččuh päin šeizou ei šuuri kyläne karielazella nimellä Lykky .Midä oigieh že nimi znuaččiu , niken ymbärykšeššä jo nyt ei i muissa .Livvin murdehešša "lykky " tarkoittau hyviä ožua .Tverinkarielan murdehen šanakirjašša tädä šanua ei ole , on vain verbi "lykätä ", kumbazešta tämä šana i rodiih .Vuožien i šadavuožien varrella tverinmualla eliässä jäi tämä šana pois miän paginašta .Vain on šäilynnyn že miän kieleššä pienen kyläzen nimen vuokši .
Kodikyläh mie ajan Lykyn kautti .Kuin i muissa karielan kylissä Lykyllä vuoži vuuvelta rahvahan lugu vähenöy .Nuoret perehet voit yhen kiän šormiloida myöten lugie .Tyhjennyt koit langetah .A vain niän Lykyn časoun’an , šiämellä lieu lämmin .Risti läimäy čirozella .Kruasittu sinizellä i zel’onazella kruaskalla časovn’a tuaš vaštuau kyläläzie i kaikkie , ket ajetah šiiričči , toivottau tervehyttä .Kekšiin , ymbäri on luajittu uuži aidane .Hyvä !Ei viššata lykkyvözet omua časoun’ua , pietäh huolda .
Kaikenmuozie aigazie nägi tämä časoun’a .Neuvvostoliiton aigana pappie ei ollun , sluužittih i stiihuo laulettih kylän akat .Vuonna 1977 Lykyn časoun’ašša kävi Šuomen akademikka Pertti Virtaranta , kumbane ajeli tverinkarielazin kylie myöten keriämässä miän kiel’dä i kul’turua .Kniigašša "Kauas läksit karjalainen " Virtaranta kirjuttau Lykkyh näh näin :
"Pieneššä Lykyn kyläššä oli vuonna 1873 vain 118 eläjiä .Kuulin , kuin šaneldih , što kylällä oli vähä kyndömuada , žentän kyläläzet ruattih kirvehellä , oldih hyvät plotnikat , piettih tuulimelliččöidä .Niidä oli kolme .Lykyllä piäkohtana oli časoun’a .Žen stuarostana oli Praskovja Matvejevna Vorobjova , vähän 70 vuotta vanhembi ."
Mie hyvin muissan Vorobjovan Paš-čikkuo , žentän što hiän moni vuotta ruado Prudovan školašša 1960–65 vuožina .Ennen urokkoida kellozella keräi meidä kluassah , lämmitti l’ožankoida , jogo päiviä luadi uborkan .Hiän oli hyväšiämine ristikanža , ei noštan iändä lapšien piällä .Šiloin myö emmä tiedän , što Paš-čikko pidäy huolda časoun’ašta , i što šielä pruazniekkoina Jumalalla kumarrellah .Prestol’noi pruazniekka Lykyllä on Kazanskoi Božja mater’ .Äijä rahvašta šilloin keräydy kyläh pruazniekkana , tuldih linnoista i ymbäri kylistä gul’aimah .Šoitettih šoitulla , karrattih i laulettih častuškoida karielakši i hormiksi .Meilä veniälän kieldä šanotah horman kielekši .
Nyt jo ei ole elošša Paš-čikkuo .Rahvaš i Lykyn časoun’a muissetah händä i jatketah hänen ruaduo .Pertti Virtaranta kyželi kylän eläjildä , kuin vanha on časoun’a .Hänellä šaneldih , što sroittih časoun’an jygeinä vuožina , konža kyläššä žiivatat ruvettih häviemäh .Oli že vuonna 1914, ennein valdankumoušta Veniällä .
Kuin vierinnemmä näih šanoih , vuonna 2024 tädyy časoun’alla 110 vuotta .Toivotan Lykyn časoun’alla i kylän eläjillä lykkyö !
Lykky on kylä
Karelian Proper
New written Tver
–
"