Texts
Return to list | edit | delete | Create a new | history | Statistics | ? Help
Tradicijad ei vanhtugoi
Tradicijad ei vanhtugoi
Veps
New written Veps
"Pühä
päiväne " -praznik sündui seičemetoštkümme vot tagaze . Siloi Šokš-külän aktivistad tahtoiškanziba kerata rahvast ičeze kodiküläs , miše sil kuluiži vepsän kel’ , miše kaičižihe vepsän kul’tur .Praznik tegihe čomaks , i tuli lujas mel’he külän eläjile da adivoile .Aigan sirttes se sureni da tegihe hüväks külän kezan tradicijaks .Nügüd’ sidä tugedab rahoil Karjalan rahvahaližen da regionaližen politikan ministerstv , a sädab kaiken Šokšun administracii ühtes külän Kul’turpertinke .
Täl vodelki praznikale tuli adivoid susedkülišpäi , Petroskoišpäi , eskai susedlidnoišpäi da agjoišpäi .Alemba "Kodima "-lehtesen toimišt jagase ühtnikoiden tundmusil praznikas .
Jelena Mugačeva
Kaikuččen voden meiden külä keradab adivoid tradicionaližele vepsläižele "Pühä päiväine " praznikale .Mindai lujas ihastoitab se , miše adivoid tuleb äi .Surel tahtol praznikaha ühtneba fol’klorižed pajo - da kargkollektivad , a külän adivod vasttaba ned ičeze komedoil aplodil .Erased kollektivoišpäi tuleskeleba praznikale kaikuččen kerdan .
Täl vodel praznik oli völ znamasižemban minun täht : minun vunuk pajati sil ühtes ičeze pradedoinke , minun tatanke , pajon , miččen kirjuti minun mam .Minei om mel’he , miše norišt surel tahtol ühtneb praznikaha , sille tuleskeleba kogonaižil perehil .Praznik om lujas čoma , sur’ spasib siš Kul’turpertin radnikoile da külän administracijale .
"Pühäl päiväižel " tehtas erazvuiččid konkursoid , mastar’-klasoid , melentartuižid vändoid – ei ole aigad tuskale . Mö lujas navedim necidä praznikad , sil kaičese vepsän kel’ , külän eläjad saba pozitivad .Tulgat meiden "Pühä päiväižele "!
L’udmila Aleksejeva
Kerdan Jurii Mugačev kerazi Šokšus "Keradam da kaičem " kollektivan .Nece kollektiv tegi sid’ "Pühä päiväine " -praznikan küläs .Kaikuččen voden mö "Randaine "-pajosebranke ühtnem praznikaha , pajatam vepsläižid pajoid .Täl vodel ezitim pajoid .Lujas navedim necidä praznikad , se ühtnezoitab lapsid da aigvoččid .
Larisa Čirkova
"Pühä päiväine " keradab norid da vanhoid , tutabid da verhid ristituid , heimolaižid , kudambad tahtoiba enamba tedištada vepsän rahvahan kul’turas , pajo - da kargtradicijoiš , külän veroiš .Täl vodel "Pühä Päiväine " -praznikal oliba čomad konkursad – "Parahim vast ", "Parahim änikkirb " da "Parahim änikpal’mik ".Adivoid opetihe tehmaha ičeze käzil vepsläižid tätüižid , pirdmaha pränikoil , kudomaha kangazpul , a völ püdmaha kalad .Täl vodel päiväine ei paštand , no irdal oli lujas läm’ , a südäin pajati , sikš ku muga äi tulnuzid ristituid jo amu ei olend Šokš-posadas .Praznikan vedäjad Aleksandra Aniskina da Aleksei Lukijančuk ihastoitiba adivoid ozoitesil , primetoil , muštatesil .Armaz kaikile Vepsän rahvahan hor tuli scenale uden programmanke .
"Pühä Päiväine " abutab ühtenzoitta rahvast da mugažo kaita vepsän rahvahan veroid da tradicijoid , čomad vepsän kel’t . Kaiken ližaks , se sirdäb tedoid Šokšun polhe rahvahale , ved’ Šokšus oma sündnuded mugoižed tetabad vepsläižed kut Pühä Iona Jašjärvelaine da Toižen gildijan kupec Mark Pimenov .Mugažo Šokš-posad om tetab pajanikoil , erased kudambišpäi nügüd’ pajataba "Randaine "-ansambl’as .Hö oma kaiken-aigaižed praznikan ühtnikad .
Hot’ täl vodel päiväine ei ozutand ni üht ičeze sädeged šokšlaižen praznikan aigan , karguid da pajoid ičemoi kelel lämbitiba ristituiden südäimid .Vodespäi vodhe vepsläine "Pühä Päiväine " tegese parembaks da čomembaks .Ved’ muga äi väged , hengen lämäd da mahtoid sinna paneb külän administracii , Kul’turpert’ , škol , sijaližed radištod da iče külän eläjad .Vaiše muga , puhudes ühthe hil’he , voib kaita vepsän rahvahan kel’t , veroid da tradicijoid .
Tradicijad ei vanhtugoi
Veps
New written Veps
"