Texts
Return to list | edit | delete | Create a new | history | Statistics | ? Help
Hyväl ruavol hyvä palku
Hyväl ruavol hyvä palku
Livvi
New written Livvic
Eli
eräs köyhy leski .Lastu hänel oli kogonaine joukko , da kai pienet .Ylen jygei oli leskel elättiä omii lapsii .
Kerran istui leski pordahil lapsien sobii paikkailemas .Ylähän olijas pezäzespäi hänen edeh pakui pikkaraine piäsköihyt .Leski otti sen kädeh da nägi – linnunpoigazel oli katkennuh jalgaine .Hyvätabaine naine punoi linnun jalgazen niitil da kohendi sen .Häi nosti linnunpoigazen pezäh .
Tuli sygyzy , linnut lennettih lämmih mualoih , dai piäsköin pezäine tyhjeni .Muga meni talvi , keviäl piäsköit tuldih uvvessah omah kodih .Erähänny piän leski tuas istui pordahil da ombeli .Dai hänen edeh lennäldi piäsköihyt .Häi pani lesken polvil suuren siemenen , čiučetti kodvazen dai lendi iäres .
Leski arbai – se on se samaine linduine , kudamal häi parendi jalgazen !Ei jogahine ristikanzu hyviä musta , a kačos , linduine passibokse toi siemenen !Naine hyväs mieles istutti siemenen muah , valeli da akkiloičči sidä kogo kezän .Sit kazvoi tikvu !Tikvu kypseni da rodih ylen suuri .Leski otti veičen , leikkai tikvan dai kerras siepäi rubei pakkumah kuldastu da hobjastu den’gua !Niidy oli muga äijy , ga ni čotaija ei suannuh ehtie !
Ihastuksis leski saneli kaiken susiedas .Ga susiedan akku rubei kadehtimah , sentäh ku oli viizas da ahnas .Häi vuotti kezän tulendan , otti pezäspäi linduzen , katkai sil jalgazen .A sit krieppi jalgazen ribuzel .Pani piäsköizen pezäh da rubei vuottamah palkua .
Konzu tuli kevät , da linnut tuldih lämmis mualoispäi , susiedan pordahil lendi linduine da toi siemenen .Se viizas naine istutti siemenen da rubei vuottamah sygyzyy .Kazvoi ylen suuri tikvu .Naine odva kandoi sen pertih .Pani veriän salbah , ku niken ei nägis , kui häi rubieu den’goi čotaimah , da rubei leikkuamah tikvua .Ga siepäi ruvettih purgevumah mavot !Net šihisten hypättih naizeh da ruvettih peruttelemah , odva piäzi pagoh .
Hyväl ruavol hyvä palku
Livvi
New written Livvic