Texts

Anhelit ilmotettih paimenilla Iisussan Hristossan šyntymäštä

February 03, 2025 in 14:57 Нина Шибанова

created the text
created the text: Viflejemin lähellä oli paimenija varteimašša yöllä lampahie. Heilä näyttäyty Hospotin anheli, ta Hospotin jumalallini valo ympäröičči hiät. Paimenet äijälti poläššyttih. Anheli šano heilä: «Elkyä varakkua. Mie tulin ilmottamah teilä hyvyä viestie, šuurta ilošanomua kaikella rahvahalla. Tänäpiänä Tuavitan linnašša teilä šynty Pelaštaja, kumpani on Hristossa, Hospoti. Tästä työ tunnetta Hänet: ripakkoloih kiäritty Lapši makuau elukkojen šoimešša». Yhtäkkie anhelin luo jiäviyty šuuri taivahallini šotajoukko, kumpani ylenti Hospotie šanoilla: Kunnivo Jumalalla taivahissa, a muan piällä olkah rauha ta ihmisillä hyvä tahto! Konša anhelit mäntih heijän luota taivahah, paimenet paistih keškenäh: «Läkkä Viflejemih! Šielä myö niämmä šen, mitä on tapahtun, šen, mistä Hospoti meilä ilmotti». Hyö lähettih kiirehešti Viflejemih ta löyvettih šielä Muarie, Josefi ta Lapši, kumpani makasi šoimešša. Tämän nähtyöh paimenet kerrottih, mitä anhelit šanottih heilä Lapšesta. Kaikin, ket kuultih paimenien šanat, kummekšittih. Muarie pani kaikki nämä šanat šiämeh ta moničči ajatteli niitä ičekšeh. Paimenet myöššyttih karjan luo, ylennettih ta passipoitettih Jumalua šiitä, mitä hyö šuatih kuulla ta nähä. Kaikki kävi juštih niin, mitein heilä oli šanottu.