ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Al’ona Jegorova. Venälaine škol Kipral

Al’ona Jegorova

Venälaine škol Kipral

вепсский
Младописьменный вепсский
Edahan Venämaspäi, Keskmäižen meren keskes, om sur’ Kipr –sar’. Sigä eläb äjiden rahvahiden ezitajid: grekalaižid, turkid, anglialaižid da toižid. Toižiden keskes Kipral eläb äi venänikoid. Heid sarel om muga äi, miše Kipral om eskai venälaižid laukoid, kus mödas venälaižid sömtavaroid, om venälaine radio, lugendlehtesid da kulehtesid. Mugažo kaikuččes sures lidnas om avaitud venälaižed školad, kus voiba opetas venälaižed lapsed. Opendamine neniš školiš om ani mugoine-žo kut i Venämas. Lapsed opendaba nenidžo predmetoid, lugeba nenid-žo kirjoid, tegeba nenid-žo ekzamenoid.

Üks’ mugoine škol seižub vanhas Pafos–lidnas. Nece škol om pen’: vaiše läz 50 last, erasiš klassoiš opendase vaiše üks’ openik. Sen tagut neciš školas kaikutte openik om kuti ičeze kodiš, kaik tundeba kaikid, kaik holduba kaikiš, kaik abutaba kaikile. Sikš ei ole čudokaz, miše lapsed navediba kävuda školha.

Pafosan školas opendasoiš ei vaiše venänikoid. Erased openikad tuliba Kiprale Ukrainaspäi, Belorussijaspäi, Latviaspäi, Gruziaspäi, Bolgariaspäi da toižiš maišpäi, no kaik pagižeba venän kelel.

Pafosan školan kahesanden klassan openikad oigenziba teile tervhensanoid da pened kirjeižed, miččiš starinoičiba vähäižen heiden elos Kipral.