Тексты

Вернуться к списку | редактировать | удалить | История изменений | ? Помощь

Hänen napernudehe voib vaiše kadehtida!

Корпус: младописьменный подкорпус

Младописьменный вепсский, публицистические тексты

Источник: Galina Baburova, Kodima. № 11, (2014), с. 3

Hänen napernudehe voib vaiše kadehtida!
(вепсский)

Vodel 2013 vilukus vepsän kalendarin prezentacijal oli tedotadud konkursParahim kalendarin čomitamine”. Voden aigan ristitud täutiba kalendarid.
Naku-ki, redukun 31. päiväl ehtal, mitte oli omištadud Vepsän kul’tursebran 25-voččen jubilejale, tehtihe Vepsän kalendar’-projektan ühthevedoid.
Žürijouk znamoiči kaks’ kaikid čomembad kalendarid. Kalendariden omištajad oma Petroskoin eläjadFaina Nikolajevna Kozlova da Maria Sem’onovna Mironova. Molembad naižed täutiba kaikuččen kalendarin lehtpolen: jogahižel päiväl starinoičiba melentartuižiš azjoiš, kleiba fotoid, tegiba kuvid, kirjutiba muštatesid da runoid. Konkursaha üntnendas Faina Nikolajevnale da Maria Sem’onovnale anttihe lahjoid muštoks. Toižen sijan sai Faina Nikolajevna, a vägesti konkursas Maria Sem’onovna.
Maria Mironova om sündunu Värasjär-külähä. Hän radoi opendajan školas. Voib olda, sikš Maria Sem’onovna nügüdehesai om lujas tark da napern ristit. Maria Mironova om aktivine Paginkluban ühtnik. Hän tuleskeleb läz kaikuččele Paginkluban vastusele. Laps’agaspäi Maria Sem’onovna tedab vepsän kel’t. No aigan sirttes hän unohtaškanzi kodikel’t. Sikš ku ei olend tarbhut pagišta sil. Tuldes Paginklubha Maria Sem’onovna zavodi johtutada sanoid, pagižeškanzi vepsän kelel kaik enamba. Hänen napernudehe voib vaiše kadehtida! Miše ei unohtada armast kodikel’t, Maria Sem’onovna lugi Kodima-lehtest da vepsänkelišt literaturad, a kaikid tundmatomid sanoid hän kirjuti lehtikoho, sanoiden znamoičendoid kacui vajehnikas. Surel tahtol hän pani muštho runoid vepsän kelel. Maria Mironova om parahim ozutez kaikile, ken navedib ičeze kodikel’t da ei tahtoi unohtada sidä. Maria Sem’onovna, Kodima-lehtez ülendase Teil! Lehtesen radnikad ozateleba Teid vägestusenke i toivotaba vahvad tervhut da väged!