Тексты

Вернуться к списку | редактировать | удалить | История изменений | ? Помощь

Hänen heng – rahvahaližes pajos

Корпус: младописьменный подкорпус

Младописьменный вепсский, публицистические тексты

Источник: Valerii Sidorkin, Kodima. № 1, (2014), с. 4

Hänen heng – rahvahaližes pajos
(вепсский)

Kul’tur: Vepsän rahvahan hor om tulnu hänen elon sureks i tärktaks palaks.
Männuden voden lopus, tal’vkus, Rahvahaližiden kul’turiden keskuses mäni Vepsän pajominun elo...- praznikeht. Venäman da Karjalan kul’turan arvostadud radnik, Venäman hengrahalahjan laureat L’udmila Melentjeva jo 35 vot ohjandab Šoutjärven Vepsän rahvahan horad.
Iče L’udmila L’vovna om sündunu Arhangel’skan agjaha. Sigä hän openzihe muzikaližes opištos, a jäl’ges tuli opendamhas Petroskoihe konservatorijaha. Muga hän jäi-ki elämaha Karjalaha. Konservatorijan opendusen jäl’ghe händast kuctihe Šoutjärvehe ohjandamha Vepsän horad. Hän hökkähti, hot’ ei pagižend vepsäks i vähä midä tezi vepsän rahvahas da kul’turas.
Konz L’udmila Melentjeva ezmäižen kerdan tuli Šoutjärvehe i kundli horan pajoid, ka vähäižen viluganzi melel. Siloi, 70-voziden lopus, kollektivan repertuaras päazjas oli venälaižid pajoid. I L’udmila L’vovna zavodi ajada Prionežjen vepsläižidme külidme. Materialad, miččid kerazi L’udmila L’vovna, mugažo Rürik Loninan i Irina Semakovan keratud materialad zavottihe otta radho. Äjan abuti siloi necen horan augonpanii Vasilii Kononov. Muga, vodespäi vodehe kollektivan repertuar zavodi täuttas.
Elädes vepsläižes küläs L’udmila Melentjeva tedišti äi tarbhaižid tedoid vepsläižiš, heiden veroiš, tradicijoiš da fol’kloras. Nügüd’ L’udmila Melentjevan abul horan repertuar om lujas sur’ i erazvuitte. Kaikutte pajo om tehtud muga čomin i hüvin, miše koncertoiden aigan kundlijoil eskai hengen sauptab. Ved’ vepsän pajo om hänen elo. Hän ičeki om nügüd’ kuti vepsän mirun palaine i tämbei ei voi kuvitelda ičeze elod horata da vepsän kul’turata.
Kollektiv Šoutjärvespäi tuli äjiden festivaliden da konkursoiden laureataks ei vaiše Venämal, no Norvegias, Švecias, Suomes, Vengrias, Estonias i Pol’šas.
L’udmila Melentjevan praznikehtal Šoutjärven Vepsän rahvahan hor pajati parahimid pajoid ičeze repertuaraspäi. A lopihe L’udmila Melentjevan eht pauklahjoičendal. Vepsän kul’turan kaičendas da kehitoitandas L’udmila Melentjevale anttihe kitändkirjaižid Karjalan valdkundan pämehelpäi.