ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Maria Košeleva. Midä tob meile Uz’ voz’?

Maria Košeleva

Midä tob meile Uz’ voz’?

вепсский
Младописьменный вепсский
Kut-žo heredas jokseb aig. Pigai om jo 2015. voz’. Meilpäi lähteb Sinižen hebon voz’ da tuleb Lambhan voz’ vai, kut sanuba astrologad, Sinižen kozan voz’. Ristituile, kudambad oma sündunuded lambhan vodel, se tob äi ozad. No toižiški ristituiš lambaz ei unohta.
Uz’ voz’ linneb ani tün’. Ei linne nimiččid libundoid da laskendoid, no sil-žo aigal voden emäg abutab teile kaikiš hüviš augotišiš. Ved’ Lambaz om lujas hüväsüdäimeline da kaiken nägeb hüvüt. Sikš, udel vodel tarbiž tehta enamba hüvid azjoid da abutada toižile, siš Lambaz pauklahjoičeb teid.
Uz’ 2015. voz’ toivotab ozakast elod kaikile ristituile. No se ei znamoiče, miše ristituile tarbiž laškoteldas da vaiše varastada ozad, heile tarbiž napernas rata. Necil vodel risituil om hüvä voimuz, miše päzuda kaikiš tarbhatomišpäi azjoišpäi da zavot’t’a ut elod.
Lambaz om ülev da hen živat, kudamb lahjoičeb lämäd da armod, sikš nece voz’ linneb satusekahan. Voden emägal om kebn da ilokaz taba, no erašti se voib vajehatadas. Sikš, ei tarbiž varastada vaiše hüväd mel’t, tarbiž olda vaumhen sihe, miše teiden mel’ voib vajehtadas. No kacmata sihe hüvut linneb enamba, mi pahut.
Lambaz om varukaz živat, sikš ei tarbiž tehta tärktoid pätandoid da ühthevedoid meletamata. Miše voz’ mäniži hüvin, tarbiž olda ei vaiše tahtokahan da aktivižen, no varukahan-ki, kut iče voden emäg. Ei tarbiž ozutada ičeze nenakahut da ülendust. Algat löugoi problemoid sigä, kus niid ei ole.
Kut vanhembile muga lapsileki tarbiž pidäda hol’t ičeze tervhudes, ku et tahtoigoi läžuda äjan.
Tarbiž muštta, miše voden emäg eläb kogos, se om lujas uskoline, toziavonaine da lujas hüvä. Sikš nece voz’ lujas kožub niile ristituile, ken tahtoib ičeleze kanzan. Kosketused neniš kanzoiš linneba lujas lämäd.
tahtoim ozatelda teid, kal’hed lugijad, Uden vodenke. Toivotam teile ozad, armastust da kaiked hüväd. Olgat tervhed da ilokahad. Elägaha teiden kanzoiš vaiše tün’, läm’ da kodikaz il’mišt. Tulgaha eloho kaik teiden toivod da uništused Udes vodes!