ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Irina Sotnikova. Äjak ilod lumi tob kaikuččele!

Irina Sotnikova

Äjak ilod lumi tob kaikuččele!

вепсский
Младописьменный вепсский
Vilukun 18. päiväl erazvuiččiš mirun maiš praznuitas Lumen päiväd. Nece praznik om völ ani nor’. Se sündui Rahvazkeskeižen suks’sportan federacijan abul vodel 2012. Sen pätegend om mel’dütoitta rahvast tal’vsportaha. Ei muite necil päiväl jo tuli tradicijaks tehta erazvuiččid sportfestivalid, konkursoid, voibuid kut lapsiden, muga aigvoččiden-ki täht.
Tal’veline Karjala nece om čoma agj aktivižen tal’vsportan da -lebun täht. Hoštai pehmed lumi päiväižen sädegiš, pakaine, verez il’mkaik nece abutab sada ihastust lebus Karjalas tal’vel. A tal’vsport vahvištoitab tervhut i andab eloväged.
Pühäpäivän äjad petroskoilaižed unohtiba televizoroiš, planšetoiš, tedomašinvändoiš i tuliba lebaidamhas ičeze kanzanke Lumen praznikale. Karjalas mugoine praznik tehtihe ezmäižen kerdan. Petroskoiš se mäni läz Gorka-ilotuzkeskust.
Necil päiväl oli čoma , irdal oli läm’, sikš praznikale kerazihe äi rahvast. Oli äi kanzoid. Kaikil oli hüvä mel’, aigvoččed iloitelihe ühtes lapsidenke. tegiba lumiukoid, vändiba lumižil, štarguiba vatruškoil.
Lumen päiväks lidnan eläjiden täht oli tehtud melentartuine ilotuzprogramm. Tehtihe kanzestafet, sportkonkursoid, miččihe ühtni enamb 100 kanzad lapsidenke. Mugažo praznikprogrammaha mülüiba velokezrajand, štargund vatruškoil, labirint. Paiči necidä praznikan adivod voiba ühtneda mastar’- klassoihe, kus heid opetihe hihtta mägisuksil da lumilaudal. Praznikan aigan tehtihe voibuid mägisuks’- da lumilaudsportan mödhe. Vägestajad saiba lahjoid da diplomoid, a kaik kanzestafetan ühtnikadšapkan Lumen päivän muštoks.
Todeks oli melentartušt! Läksi lujas čoma praznik. Kaiken päivän kului muzik. A olijoiden muhud andoiba pozitivad toižile ristituile.
Ühthižed vändod da voibud Lumen päiväl om hüvä , miše kerata kanz ühthe. Meil, lapsil da aigvoččil, om äi ühthižid azjoid, kaik navedim iloiteldas i hüvin mänetada aigad, sikš pidab paksumba johtutelda neciš i ühtneda mugoižihe praznikoihe.