ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Marina Ginijatullina. Tuliba tutabikš parahimad vepsän kelen tundijad

Marina Ginijatullina

Tuliba tutabikš parahimad vepsän kelen tundijad

вепсский
Младописьменный вепсский
Olimpiad: Openikad ozutiba ičeze kel’tedoid da mahtoid.
Joga voden jäl’ghe keväz’pästusid openduzministerstv tegeb karjalan, vepsän da suomen keskregionališt olimpiadad. Muga oli necil-ki vodel. Sulakun 4. päiväl lapsed Petroskoišpäi, Karjalan valdkundan rajonoišpäi da Piterin agjaspäi kerazihe Petroskoihe, miše ozutada ičeze kel’tedoid da mahtoid.
Necil vodel olimpiad tehtihe jo ühesatoštkümnenden kerdan i sihe ühtni vižkümne kaks’ openikad. Nene oliba lapsed, kudambad opendaba karjalan, vepsän da suomen kelid nel’l’ vai seičeme vot. Olimpiad oli Karjalan openduzmahtoiden institutas. Lapsid tervehtoitiba openduzministerstvan radnik Natalia Vasiljeva, Karjalan openduzmahtoiden institutan varapämez’ Jelena Bogdanova da Karjalan rahvahan ühtištusen ühtnik Valentina Karakina. sanuiba hüvid da lämid sanoid olimpiadan ühtnikoile i toivotiba heile satusid kirjutades olimpiadradoid. Vepsän kelen tundijoid oli kaiked 11 mest. Nene oliba lapsed Petroskoišpäi, Kalagespäi da Vidlaspäi.
Karjalas vepsän kel’t opetas nelläs školasPetroskoiš (suomalaiž-ugrilaižes školas), Kalagen, Šoutjärven da Šokšun školiš. Mikš olimpiadal ei olend lapsid Šoutjärvespäi da Šokšuspäi? Tedan, miše Šokšun školas zavottihe opeta udes vepsän kel’t kaks’ vot tagaze i sigä völ ei ole lapsid, miččed voižiba ühtneda olimpiadaha. Šoutjärven školas opetas vepsän kel’t jo äjan vozid. Ka mikš ei ühtnend ni üks’ openik? Necen polhe en voi sanuda nimidä...
Olimpiadrados oli kümne erazvuittušt tegod. Nene tegod tarbiž oli tehta kahtes časus. Tegoiden keskes oli mugomid, kut kundelta tarkašti tekst da jäl’ges valita vastusid küzundoihe tekstad möto, panda sanad tarbhaižehe formaha, antta vastusid küzundoihe, starinoita kuvad möto i toižid. Kaik lapsed ladiba kaik olimpiadtegod, vaiše ladiba niid erazvuiččikš. Kense paremba tegi grammatiktegoid, a ken-se paremba starinoiči, i žuri muga jagoi sijad.
Nelländen openduzvoden gruppas ezmäižen sijan sai Polina Ševčuk Kalagespäi. Toižen sijan žuri andoi Vasilisa Virolaižele Petroskoišpäi (suomalaiž-ugrilaine škol), a koumandenAnastasija Jarkojevale Kalagespäi.
Seičemenden openduzvoden gruppas vägesti Vladimir Romanov Vidlaspäi. Toižen sijan sai Maria Kočerina, koumandenArina Ščerbakova. Molembad neičukaižed oma Kalagen školan openikad.
Kaikile lapsile anttihe sertifikatoid, a olimpiadan vägestajad saiba diplomoid da lahjoid. Parahimad keliden tundijad ajaba kezal Soumehe.