ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Maria Košeleva. Üläopenikad vajehtihe tedo- da kul’turmahtištol

Maria Košeleva

Üläopenikad vajehtihe tedo- da kul’turmahtištol

вепсский
Младописьменный вепсский
Semendkun 14.-16. päivil čomas Mari-El-valdkundan Joškar-Ola-lidnas mäni II rahvazkeskeine üläopenikoiden Suomalaižugrilaižiden rahvahiden kal’huz’-forum. Neche forumaha ühtni äi üläopenikoid da aspirantoid, kudambad oppiba suomalaiž-ugrilaižen mirun problemoid. oliba tulnuded ei vaiše Venäman suomalaiž-ugrilaižiš valdkundoišpai, no eskai verhiš maišpäi-ki: Suomespäi da Germaniaspäi.
Forumaha ühtni enamb 220 ristitud. Sen tomotajan oli Marin valdkundaline universitet. Foruman pätegendan oli tehta uzid kosketusid suomalaižugrilaižiden üläopenikoiden keskes, miše vajehtadas tedo- da kul’turmahtištol. Necil azjtegol oli äi hüvid da tarbhaižid tegendoid. Ozutesikš, pidi levitoitta ühthižrad suomalaižugrilaižiden universitetoiden keskes. Toižen pätegendan oli problemoiden pätand nügüdläižen suomalaiž-ugrilaižen tedon küzundoiš.
Foruman aigan oli kul’turprogramm-ki, miččehe mülüiba foruman avaiduz, sen lopind da sekcijoiden rad. Kaik sekcijad oli sidotud suomalaiž-ugrilaižen mirun kelenke, kul’turanke, problemoidenke da niiden pätandanke.
No paiči oficiališt palad sigä oli lujas äi melentartuižid azjoid. Ezmäks, nece forum ühtenzoiti erazvuiččiden rahvahiden norištod. Foruman lopus oli etnodiskotek. Nece oli ilokaz da čoma azjtego. Kaik üläopenikad kargaižiba, pajatiba da iloitelihe. Niken ei tahtoind, miše forum lopižihe. Kaik üläopenikad tundištihe toižiden rahvahiden kul’turanke, jagoihe toine toiženke arvokahil tedoil, vajehtihe radon mahtištol, löuziba täs äi uzid sebranikoid.
Olen ilokaz, miše ühtnin neche forumaha, sikš miše löuzin uzid sebranikoid, oleskelin uziš sijoiš da tundištimoi toižiden suomalaiž-ugrilaižiden rahvahiden ul’turanke da kelenke. Mugažo tahton sanuda, miše nece oli lujas hüvä konferencijaha ühtnendan mahtišt. Minä völ kerdan olen el’gendanu, miše tarbiž tugeta da kehitoitta ičein kel’t da rahvast.
Oli mugoine tundmuz, miše kaik oma tedanuded toine tošt jo lujas amu. Kaiken aigan oli sebrmeline da ilokaz il’mišt. Oliži hüvä, ku mugoižid azjtegoid oliži enamba da ned mänižiba kaikiš suomalaiž-ugrilaižiš sijoiš.