ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Al’manahan verez nomer

Al’manahan verez nomer

вепсский
Младописьменный вепсский
Heinkus läksi eloho uz’ Verez tullei-al’manahan nomer. Se om omištadud Virantanaz-eposale, miččen tegii om hüvä vepsän kelen tundii, filologijan tedomez’ Nina Zaiceva. Ezmäižen kerdan Virantanaz-epos vepsän kelel oli paindud vodel 2012.Vodes päliči oli paindud sen kändmine suomen kel’he. Kaikuččes kulehtesen nomeras pidäiži olda se, mi mel’dütoitaži i koskiži lugijoid. Neciš nomeras se om eposan kändmine venän kel’he. Necen čoman kändmižen om tehnu tetab runoilii, kändai, Zaonežjen tundii V’ačeslav Agapitov.
V’ačeslav Agapitov äi vozid om oppinu Zaonežjen kul’turad, sikš hänen kändmine om čomenzoittud pohjoižvenälaižil motivoil da paginsanoil. Äjile, ken jo ehti lugeda eposan venän kelel, se lujas tuli mel’he. Al’manahan tegijad sanuba sur’ spasib V’ačeslav Agapitovale hänen čomas da jügedas rados. Nece om todeks arvokaz i tärged azj neniden täht, ken navedib, arvostab i kaičeb ičeze rahvahan kul’turad. Ihastoitab se-ki, miše nügüd’ venälaižed-ki voiba lugeda eposad. Sen kal’t ned voiba tundištadas vepsän rahvahan istorijanke, sen tradicijoidenke da veroidenke, rahvahan fol’kloranke.
Al’manahas mugažo voib lugeda runoilijan Dmitrii Gorohan kirjutesen eposan polhe, sen znamoičendas vepsän rahvahan täht. Dmitrii Goroh lujas arvostab Nina Zaicevan panendad Pohjoižen kul’turaha. Hän rindatab Virantanazeposan Kalevala-eposanke. Ved’ niiš om ühthine ideilahjoita ičeze rahvahale kul’turišt muštod, ezitatoiden arvostust.
Nece kirjutez om čomenzoittud fotoil, miččil om ezitadud vepsläižed runoilijad da kirjutajad, a mugažo vepsänkeline literatur: kirjad, openduzkirjad, vajehnikad, runokogomused... Ned čomitaba meiden al’manahad i tegeba sidä mujukahaks.
Kut edeližiš-ki kulehtesen nomeroiš, neciš al’manahas voib löuta runoid, starinoid da sarnoid lapsiden täht. Avtoroiden keskes oma kut kaikile tutabad kirjutajad, ozutesiks, Valentina Lebedeva, Natalia Silakova, mugažo nored avtorad, kudambad vaiše zavodiba kirjutada.
Čoman koren al’manahan täht tegi tetab vepsläine taidehpirdai Aleksei Maksimov.
Kaikutte tahtnik voib ostta al’manahan Periodikapainištos, miččen adres om: Petroskoi, Titovan ird, 3. Sen maks om 100 rubl’ad.