ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Voik

Voik

вепсский
Младописьменный вепсский
Nikolai Abramovan muštoks

Kuldoi Kol’a, kuna känditoi,
Kuna sinä pigei säditoi,
Neche tedmatomha röunaha,
Neche tundmatomha čogaha.

Aigahk sinei oliž mända-se,
Aigahk sinna oliž tönduda.

Ed ved’ kaiked sinä sanund-se,
Ed ved’ kaiked meile jätand-se.

Sinei andoi Jumal äjan-se,
Andoi vaihuzid i virkehid,
Andoi mahtoid sanoid kerata,
Toine toižhe hüvin ližata,
Vaihen vaiheze-se panelta,
Sanan sanaha-se sidelta.

Kenak meile nügüd’ pajatab,
Kenak uzid runoid ezitab?

Otid kerdale kaik vaihuded,
Sanumatmad sulad sanaižed!

Nügüd’ vilu om ved’ hengudel,
Ka i vilu vepsän röunaižel,
Kenak sille pajoid pajatab,
Kenak sidä muga arvostab?

Jätid meid kibud tedmaha,
Jätid meid da tuskad tundmaha.

Ka i ičhižid ed žal’l’oičend,
Mamad-Marjad ed kaičend,
Edel aigad jätid raukaižen,
Jätid nähta mustan päiväižen.

Voi , Kol’a, mikš rigehtid,
Toižhe čurha uitta kiruhtid,
Ed jo sinä libu jaugoile,
Ed jo sinä sil’mid avaida,
Ed jo sanu sulid sanaižid,
Ed jo sanu veslid vaihuzid.

Eisa lodeižoitta sindai jo,
Eisa pagištoitta elole.