Тексты

Вернуться к списку | редактировать | удалить | История изменений | ? Помощь

Keväz’ da gnomad

Корпус: младописьменный подкорпус

Младописьменный вепсский, художественные тексты

Источник: Kändi Marina Ginijatullina, Kodima. № 2, (2016), с. 8

Keväz’ da gnomad
(вепсский)

Mecas eliba gnomad. Tal’vel abutiba mecan eläjile: puhtastiba puiden oksid lumespäi, miše päiväižen sädeged voižiba päzuda oksiden läbi.
Gnomad lujas navediba Tal’ved. Vaiše uhokun lopus tustuiba lämid päivid, sen täht kerazihe, miše kucta Kevät. Üks’ gnom sanui, miše voib mända irdale da kidastada: ”Keväz’! Tule pigemba da heraštoita meid tal’vunespäi!”.
Toine sanui, miše voib pajatada Kevädele pajoižen, miše se tuliži pigemba.
Hätken gnomad meletiba, lopuks pätiba mända jogennoks küzumaha nevondad.
Gnomad sanuiba jogele, miše hän kucuiži Kevät. Jogi andoi vastusen:
Minä en voi kucta Kevät.
Minei tarbiž ezmäi mureta .
Siloi gnomad pätiba, miše heile abutaba pud. Pud andoiba mugoižen vastusen:
Miše Keväz’ homaičiži meid, meile tarbiž vajehtada meiden sädoid.
Konz hän nägištab, miše olem čomiš sädoiš, tuleb iče.
Gnomad pakičiba linduižid abutada heile.
Linduižed sanuiba heile muga:
Meid om vähä mecas.
Keväz’ ei kulišta meid. Konz meiden sebranikad tuleba suvespäi, siloi kucum ühtes Kevät.
Kuni gnomad eciba sidä, ken abutaiži heile, joges mureni jäd, puiš ozutihe urbad da pened vihandad lehtuižed, linduižed pördihe lämišpäi maišpäi.
Gnomad mäniba möst jogennoks da küzuiba:
Jogi, sinai ei ole jo jäd, konz sinä kucud Kevät?

Minä en murendand jäd, tuli neižne da iče murenzi sidä, sanui Jogi.
Kaikid melekahamb gnom läksi mecanröunale da sanui:
Ka tuli jo Keväz’, a tahtoim händast kucta!

Sid’ mecaspäi läksi čoma neižne, kudamban nimi om Keväz’.