ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Maria Košeleva. Tarbhašt radod tehtas ei tühjaks

Maria Košeleva

Tarbhašt radod tehtas ei tühjaks

вепсский
Младописьменный вепсский
Vot mäni-ki völ üks’ keza. Lapsed läksiba školha, üläopenikadüläopištoho samha uzid tedoid. No jogahižen voden heiden keskes oma mugoižed, kudambiden täht se ei ole vaiše uden openduzvoden augotiž, uziden tedoiden samine. Heiden täht se om hašk udehe eloho, uden elon verajiden avaiduz. pagižem lapsiš, kudambad läksiba ezmäižehe klassaha vai ezmäižele voz’kursale.
Kaiken aigan voib pagišta siš, miše üläopišton aigad oma kaiked parembad ristituiden elos. Kedse meletaba muga, ked-se ei, no ridelmata voib sanuda, miše nene aigad tuleba ristituiden muštho pit’käks aigaks. Meiden Petroskoin uneversitet täl vodel avaiži ičeze uksed tuhiden abiturientoiden täht. Nügüd’ völ voib nähta, kut jogahižen päivän üläopišton edes vai sen südäimes äi norid üläopenikoid tundištase toine toiženke. Heid jo varastab äi melentartuižid azjtegoid, hüvid da pahoid melid, arvznamoid, äi uzid idejoid da satusid.
Meiden lugendlehteses em voigoi ei kirjutada meiden Baltianmerensuomalaižiden keliden kafedran polhe, ved’ täl vodel sen satused lujas ihastoitaba kaikid. Tetas, miše nügüd’ tehtas lujas äi radod rahvahiden keliden kehitoitandan da kaičendan täht. Se andab meile el’geta, miše kaik aktivistoiden, üläopišton da valdmehiden rad tehtas ei tühjaks. Kodvuzlaudkundan (kodvuzkomissijan) tedoiden mödhe, Baltianmerensuomalaižiden keliden kafedral oli kaikid suremb konkurs filologižel tedokundal. Ei sa ei olda korktad mel’t siš. Kogonaz oli oigetud 113 pakičust. Karjalan da vepsän kelen gruppoihe oli kaikid suremb konkurs. Konkurs suomen da karjalan kelen opendamižele oli 9,8 mest sijaha, vepsän da suomen kelen opendamižele konkurs oli vähäšt penemb – 7, 6 mest sijaha. Nece om lujas korged satuz!
No oma opalad-ki momentad. Üläopištol meiden kafedran täht oli anttud vaiše 16 maksutont sijad. A se znamoičeb, miše ei kaik tahtnikad opendase nügüd’ sil kafedral. Ozutesikš, karjalan kelen gruppas 49 tahtnikoiden sijas opendase 11 mest, kudambiden keskes 6 maksaba openduses. Vepsläižes gruppas 23 tahtnikoišpäi vaiše koume opendaškandeba kel’t.
Om melentartušt, miše vepsläižes gruppas ei ole vepsläižid. Kaik koume neičukašt tuliba Petroskoihe toižiš lidnoišpäi. Üks’ tuli Segežaspäi, toineMurmanskaspäi, a koumanz’ neičukaine ajoi eskai Arhangel’skaspäi. Konz minä küzuin heil, mikš tuliba Petroskoihe opendamha vepsän kel’t, sanuiba, miše valites kafedrad ezmäižel sijäl heiden täht oli taht opeta suomen kel’t. Vepsän kel’t tahtoiba opeta, sikš miše se om ani tundmatoi kel’ heiden täht, i miše om lujas melentartušt opeta sidä suomen kelenke ühtes. Karjalan kelen gruppas läz kaik oma karjalaižed, no niken ei teda karjalan kel’t.
Kut-žo čoma om, miše noril ristituil om melentartuz’ da taht opeta ičeze rahvahan kelid. Kaikid tärktemb, miše nenid üläopenikoiden sil’miš nägub melentartuz’ keliden opendushe. Toivotan, miše se lämoi ei sambu edemba-ki, a vaiše palaškandeb völ kovemba. Tahtoidas uskta, miše heiden keskes oma ned, kudambad ei antkoi kel’he seišta ühtel sijal da miše völ pit’kha meiden kafedrale tuleškandeba uded da uded keliden kaičijad!