ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Anna Anhimova. Vepsläine pajo

Anna Anhimova

Vepsläine pajo

вепсский
Младописьменный вепсский
2016. voden kül’mkus Vepsän rahvahan hor praznuičeb ičeze 80-vottušt jubilejad. Kollektivan päkal’huz’ om siš, miše horan noril pajanikoil om voimuz kundelta vepsläšt pajod vanhembal sugupol’velpäi. Nügüd’ Vepsän rahvahan horas om 20 ühtnikad. Ühtnikoiden enambištol om vepsläižid jurid. Hor äjan ajaleb koncertoidenke, ühtneb erazvuiččihe sädandradon festivalihe da külähižihe praznikoihe. Paksus kollektiv oleskeleb adivajelusidenke verhiš maiš-ki mugažo.
Etnokul’turižiden iniciativoiden kehitoitandan da tugen fond mülüti Vepsän rahvahan horan ezitused P.R.O.–Праздник.Ремёсла. Обучение-projektaha. Projektan aigan keväz’kuspäi kül’mkuhussai kävutoittas Igähižiden rahvahiden tedotuz- da openduzverkЛьыоравэтльан”- keskregionaližen sebran rahatugi.
Kezan aigan Vepsän rahvahan hor eziti erazvuiččid interaktivižid programmoid aigvoččiden da lapsiden täht, ühtni koncertoihe Šoutjärves, Tervalas, Enarves da festivalihe Kiži-sarel, Kingiseppas, Petroskoiš. Tradicijoiden sirdänd ühtes sugupol’vespäi toižehe om tarbhašt tozi tradicionaližen pajatamižen täht. Horan augonpanii om Vasilii Ivanovič Kononov, vepsläine, hareograf, Venäman arvostadud taidehmez’. Vodespäi 1987 ohjandab horad L’udmila L’vovna Melentjeva, Venäman da Karjalan arvostadud kul’turradnik.
Horan repertuaras om rahvahan pajoid, horovodoid, rahvahan elon teatrozutelusid. P.R.O.– Праздник. Ремёсла.Обучение-projektan abul horan ühtnikoiden täht om osttud uded vändimed. Äi vozid hor tehleb erazvuiččid mastar’-klassoid, ühtneb ekspedicijoihe, keradab etnografišt materialad küliš.
Nügüd’ Vepsän rahvahan hor L’udmila L’vovnan ohjandusel vaumičese jubilejaks, mitte mäneb Karjalan Rahvahaližes teatras necen voden sügüzel.